சர்வதேச நீதி கோரிய ‘அணையா விளக்கு' போராட்டத்துக்கு அனைவரும் இணைந்து வலுச்சேர்க்க வேண்டும்

தமிழரசுக் கட்சியின் மட்டு. எம்.பி. ஞா.சிறிநேசன்

- 

செம்மணிப் புதைகுழி சர்வதேச கண்காணிப்பின்கீழ் விசாரணை செய்யப்பட வேண்டும், ஆய்வுசெய்யப்பட வேண்டும் என்ற கோரிக்கைகளை முன்வைத்து முன்னெடுக்கும் போராட்டத்துக்கு அனைவரும் இணைந்து வலுச்சேர்க்க வேண்டும். தமிழ் தேசியபற்றாளர்கள் மட்டுமன்றி மனித உரிமை செயற்பாட்டாளர்களும் பூரண ஆதரவு வழங்க வேண்டும் என தமிழரசுக் கட்சியின் மட்டக்களப்பு மாவட்ட பாராளுமன்ற உறுப்பினர் ஞா.சிறிநேசன் கோரிக்கை விடுத்துள்ளார்.

நீதிகோரி இளையோரால் நமக்காக முன்னெடுக்கப்படும் இந்த 'அணையா விளக்கு' போராட்டத்துக்கு அணையாமல் ஒதுங்காமல் அனைவரையும் பங்குபற்றுமாறு கேட்டுக்கொள்கின்றேன். உள்நாட்டு பொறிமுறையின் ஊடாக படுகொலைசெய்யப்பட்ட ஊடகவியலாளர்கள், அரசியல் தலைவர்கள் தொடர்பான விடயங்களை வெளியில் கொண்டுவர முடியாத கையறு நிலையில் அரசுகள் காணப்படுகின்றன. இது தொடர்பான விசாரணைகள் சர்வதேச ரீதியில் நடைபெற்றால்தான் உண்மைகள் வெளிவரக்கூடிய வாய்ப்புள்ளதாகவும் அவர் தெரிவித்தார்.

ஞா.சிறிநேசன் எம்.பி.யின் ஊடக சந்திப்பு மட்டக்களப்பு, செட்டிபாளையத்தில் உள்ள அவரது இல்லத்தில் நேற்றுக்காலை நடைபெற்றது. இதன்போதே அவர் இவ்வாறு தெரிவித்தார்.