கல்லறை வீரர்கள்

மரணத்தின் பின்னர் என்ன நடக்கும்? ஆவிகள் குறித்த நம்பிக்கையை வலுப்படுத்திய 20 ஆம் நூற்றாண்டின் மிகப்பெரிய புதைபொருள் அகழ்வு ரெறக்கோட்டா வீரர்கள் என அழைக்கப்படும் இந்தக் களிமண் பொம்மைகளின் வயது ஏறக்குறைய 2,500. இவற்றை சீனாவின் பண்டைய தலைநகராகிய ஷியான் நகரில், 1974 ஆம் ஆண்டு அகழ்ந்தெடுத்தார்கள்.

- 

வயலொன்றில் கிணறு தோண்டும்போது, தற்செயலாக இந்த ரெறக்கோட்டா வீரர்கள் வெளிப்பட்டிருக்கின்றனர். இதுவே சென்ற நூற்றாண்டின் மிகப்பெரும் அகழ்வென்று நம்பப்படுகிறது. கி.மு 210 இல் இறந்த சீனாவின் ஷிஹுவாங் என்னும் பேரரசனின் கல்லறை இது என கண்டறியப்பட்டுள்ளது. அத்துடன் சீன வரலாற்றைப் பற்றிய பல அரிய தகவல்களையும் இந்தக் கல்லறை பகிரங்கப்படுத்தியுள்ளது. அத்துடன் யுனெஸ்கோ நிறுவனத்தினால் பாதுகாக்கப்பட வேண்டிய கலாசார, பாரம்பரிய முக்கியத்துவம் பெற்ற இடமாக 1984 இல் அறிவிக்கப்பட்டுள்ளது.

தொடரும் அகழ்வாராய்ச்சிகள்

வரலாற்றுக்கு முற்பட்ட காலம் முதற்கொண்டு சீனஇராட்சியத்தை ஆட்சி செய்த 13 அதிமுக்கிய சீன வம்சங்களின் ஆட்சியின் போது ஷியான் நகரம்தான் தலைநகராக இருந்திருக்கிறது. சென்ஸி மாநிலத்திலுள்ள லிஸான் மலைக்கு வடக்கே ஷியான் நகர் அமைந்துள்ளது. இங்கு பல கல்லறைக் கட்டடங்கள் காணப்படலாம் என நம்பப்படுவதால் லிஸான் மலையை அண்டிய பகுதிகளில் தற்போதும் அகழ்வாராய்ச்சிகள் நடந்து வருகின்றன.

ஆவிகள் அழிவதில்லை

பொதுவாக மனிதன் இறந்த பின் அவனுடைய ஆவி அழிவதில்லை என்ற நம்பிக்கையின் அடிப்படையில் பண்டைக்கால மனிதர்கள் மரணச் சடங்குக்குப் பெரும் முக்கியத்துவம் அளித்தனர். அரசன் இறக்கும்பொழுது, அவனது மெய்க்காவலர்கள் மற்றும் படையிலேயே மிகச்சிறந்த 100 -300 வீரர்களை உயிரோடு அடக்கம் செய்து விடுவர். மன்னனின் மறுமையிலும் இவர்களே காத்து நிற்க வேண்டும் என்ற நோக்கோடு காலங்காலமாய் நடந்து வந்த வழக்கம் இது. இந்த நம்பிக்கையில் உருவாகிய கல்லறை சிற்பக்கலை, ஓவியம், எழுத்து வளர்ச்சி, சிற்பம், சிலைவடித்தல் முதலிய பல்வேறு பண்டைக்கால கலைகளைப் பிரதிபலிக்கும் கட்டடங்களாக இன்று திகழ்கின்றன. இயற்கை நில அமைவைப் பயன்படுத்தி மலைப்பகுதிகளைச் சார்ந்து கல்லறை கட்டடங்கள் நிர்மாணிக்கப்பட்டுள்ளன. நான்கு பக்கங்களும் சுவரால் கட்டப்பட்டுள்ள கல்லறைகளுக்கு நான்கு பக்கங்களிலும் நுழைவாயில்கள் உள்ளன. நான்கு மூலைகளிலும் முக்கோண வடிவிலான சிறிய கட்டடங்களும் உள்ளன.

கல்லறை வீரர்கள்