புதிய பிரேரணையின் அவசியம் தொடர்பில் பிரஸ்தாபியுங்கள்

ஐ.நா. மனித உரிமைகள் உயர்ஸ்தானிகரிடம் மாற்றுக்கொள்கைகளுக்கான நிலையம் வலியுறுத்தல்

- (நா.தனுஜா)

நாட்டுக்கு வருகைதரவுள்ள ஐ.நா மனித உரிமைகள் உயர்ஸ்தானிகர் வோல்கர் டேர்க் போரினால் நேரடியாகப் பாதிக்கப்பட்ட வட, கிழக்கு மாகாணங்களுக்கும் மனிதப் புதைகுழிகள் கண்டறியப்பட்ட பகுதிகளுக்கும் விஜயம் மேற்கொள்ளவேண்டும் என்று வலியுறுத்தியிருக்கும் மாற்றுக்கொள்கைகளுக்கான நிலையம், இலங்கை தொடர்பில் பேரவையில் புதியதொரு தீர்மானத்தைக் கொண்டுவரவேண்டியதன் அவசியத்தை சுட்டிக்காட்ட வேண்டும் எனவும் தெரிவித்துள்ளது.

ஐக்கிய நாடுகள் மனித உரிமைகள் உயர்ஸ்தானிகர் வோல்கர் டேர்க் எதிர்வரும் 23 ஆம் திகதி நாட்டுக்கு வருகைதரவுள்ள நிலையில், இவ்விஜயத்தின்போது விசேடமாகக் கவனத்திற்கொள்ளப்பட வேண்டிய விடயங்களை உள்ளடக்கிய மாற்றுக்கொள்கைகளுக்கான நிலையத்தினால் வெளியிடப்பட்டிருக்கும் அறிக்கையில் மேலும் கூறப்பட்டிருப்பதாவது,

ஐக்கிய நாடுகள் மனித உரிமைகள் உயர்ஸ்தானிகர் வோல்கர் டேர்க் இம்மாதம் நாட்டுக்கு வருகைதரவுள்ளார். இது கடந்த ஆண்டு அநுரகுமார திசாநாயக்க ஜனாதிபதியாகத் தெரிவுசெய்யப்பட்டதன் பின்னர் இடம்பெறுகின்ற உயர்ஸ்தானிகரின் முதலாவது விஜயமாகும். நாடு முகங்கொடுத்துவரும் ஆட்சி நிர்வாக மற்றும் பொருளாதார நெருக்கடிகளுக்கும், மூன்று தசாப்த காலப் போர் முடிவுக்குக்கொண்டு வரப்பட்டதன் பின்னரும் தொடரும் தாக்கங்களுக்கும் மத்தியில் மிகமுக்கியமானதொரு தருணத்திலேயே இவ்விஜயம் இடம்பெறுகின்றது.