இஸ்ரேல் மீது ஈரான் கடும் தாக்குதல் இலங்கைப் பெண்கள் இருவர் காயம்

ஈரானானது இஸ்ரேல் எங்கும் நேற்று ஞாயிற்றுக்கிழமை அதிகாலை கடும் ஆளற்ற விமானத் தாக்குதல்களை நடத்தியதில் சிறுவர்கள் உள்ளடங்கலாக குறைந்தது 10 பேர் பலியானதுடன், இரு இலங்கைப் பெண்கள் உட்பட 200 பேருக்கும் அதிகமானோர் காயமடைந்துள்ளனர்.

- 

இந்தத் தாக்குதல்களால் அந்தப் பிராந்தியத்திலுள்ள கட்டிடங்களுக்கு கடும் சேதம் ஏற்பட்டுள்ளதுடன், சில கட்டிடங்கள் தீப்பற்றி எரிந்துள்ளன.

டெல் அவிவ் மற்றும் ஹெய்பா நகர்களிலும் அதனைச் சூழ்ந்துள்ள பிரதேசங்கள் மீதும் ஈரான் நடத்திய தாக்குதல்களிலேயே இலங்கையைச் சேர்ந்த இரு பெண்கள் காயமடைந்துள்ளதாக அங்கிருந்து வரும் செய்திகள் தெரிவிக்கின்றன.

அவர்களில் ஒருவர் டெல் அவிவ் நகரின் தெற்கேயுள்ள வீடொன்றில் பணியாற்றி வந்துள்ளார். இந்நிலையில் அந்த வீட்டின் மீது நேற்று அதிகாலை 3.30 மணியளவில் நடத்தப்பட்ட தாக்குதலில் அந்தப் பெண் காயமடைந்துள்ளார். அவர் தற்போது தனக்கு ஆதரவளித்து வந்த அந்த வீட்டிலுள்ள குடும்பத்தினர் சகிதம் இடம்பெயர்ந்துள்ளதாக தெரிவிக்கப்படுகிறது.

அதேசமயம் பாட் யாம் பிராந்தியத்தில் நேற்று அதிகாலை 4 மணியளவில் நடத்தப்பட்ட தாக்குதலில் பிறிதொரு இலங்கைப் பெண் காயமடைந்துள்ளார். அவருக்கு தாக்குதலால் உடைந்து விழுந்த கண்ணாடியால் வலது கரத்தில் சிராய்ப்புக் காயங்கள் உள்ளடங்கலான காயங்கள் ஏற்பட்டுள்ளன.

இந்தத் சம்பவத்தையடுத்து காயமடைந்த இலங்கையர்களுடன் தனிப்பட்ட முறையில் உரையாடியதாக இஸ்ரேலுக்கான இலங்கைத் தூதுவர் நிமால் பண்டார தெரிவித்தார். இந்நிலையில் நிலைமையை உன்னிப்பாக அவதானித்து வருவதாக தெரிவித்த இஸ்ரேலிலுள்ள இலங்கைத் தூதரகம், இஸ்ரேலில் அபாய நிலைமையிலுள்ள அனைத்து இலங்கைப் பிரஜைகளையும் உடனடியாக தொடர்பு கொள்ளுமாறு கோரியுள்ளது.