ஸ்ரீ பொன்னம்பலவாணேஸ்வரர் ஆலயம் கருங்கல் சிவாலயமாக சிறப்புற்று மிளிர்கிறது

இலங்கையில் தனிப் பெரும் கருங்கல் சிவாலயமாக விளங்கும் பிரசித்தி பெற்ற ஸ்ரீ பொன்னம்பலவாணேஸ்வரர் ஆலயம் தேசிய வீரராகப் புகழ்பெற்ற சேர். பொன்னம்பலம் இராமநாதன் அவர்களால் கட்டப்பட்டது. 1906 ஆம் ஆண்டில் இவ்வாலயத்தின் கருங்கல் வேலைகள் ஆரம்பிக்கப்பட்டு 1915 ஆம் ஆண்டு கட்டி முடிக்கப்பட்டது.

- 

சேர். பொன்னம்பலம் இராமநாதனின் தந்தையார் ஸ்ரீமான் பொன்னம்பல முதலியார் 1857இல் கட்டிய சிறிய சிவாலயம் இருந்த இடத்தில் தான் பாலஸ்தாபனம் செய்யப்பட்டு புதிய ஆலயம் அமைக்கப்பட்டது. தமிழ்நாட்டில் சிதம்பரம் உட்பட பிரசித்தி பெற்ற சிவாலயங்களுக்கு விஜயம் செய்து தரிசித்த சேர். பொன்னம்பலம் இராமநாதன், தமது பெருவிருப்புக் கிணங்க அந்த ஆலயங்களுக்கு ஒத்ததாக இந்த ஆலயத்தினை உருவாக்க ஆர்வம் கொண்டு தென்னகத்திலிருந்து சிற்பாசாரியார்களை அழைத்து வந்து ஸ்ரீ பொன்னம்பலவாணேஸ்வரர் ஆலயத்தை நிர்மாணித்தார்.

முற்றிலும் கருங்கற்களினால் சிவாகம முறைப்படி கட்டப்பட்ட இவ்வாலயம் சிறந்த கட்டிடக்கலைக்கு உதாரணமாக, அரிய சிற்பக் கலைச் சிறப்போடு விளங்குவது எமக்குப் பெருமை அளிப்பதாகும். அம்பாள் கோபுரம் மூன்று தளத்தைக் கொண்டதாகவும் பிரதான கோபுரம் 5 தளத்தைக் கொண்டதாகவும் இருப்பதைக் காணலாம்.