குற்றச்சாட்டுக்களை மறைப்பதற்காக புதிய கணக்காய்வாளர் நியமனமா?

அரசாங்கத்துக்கு எதிராக தெரிவிக்கப்படும் குற்றச்சாட்டுக்கள் அனைத்தும் ஜனவரி மாதம் முதல் புதிய கணக்காய்வாளர் நாயகத்தின் கணக்காய்வுக்கு உட்பட இருக்கின்றன. அந்தக் குற்றச்சாட்டுக்களை மறைப்பதற்காகவா, கணக்காய்வாளர் நாயகம் பதவிக்கு தகுதியுள்ள ஒருவர் இருக்கும் நிலையில், ஜனாதிபதி வெளியில் இருந்து ஒருவரை நியமிக்க முயற்சிக்கிறார் என்ற சந்தேகம் எழுகிறது என்று ஐக்கிய மக்கள் சக்தி உறுப்பினர் முஜிபுர் ரஹ்மான் தெரிவித்தார்.

- எம்.ஆர்.எம்.வசீம், இராஜதுரை ஹஷான்

பாராளுமன்றத்தில் நேற்று புதன்கிழமை நடைபெற்ற 2023ஆம் ஆண்டின் 09ஆம் இலக்க ஊழல் எதிர்ப்புச் சட்டத்தின் கீழான ஒழுங்குவிதிகள் மீதான விவாதத்தில் கலந்துகொண்டு உரையாற்றுகையிலேயே இவ்வாறு அவர் தெரிவித்தார்.

அவர் அங்கு தொடர்ந்து உரையாற்றுகையில்,

அரசாங்கத்தின் கூட்டுத்தாபனம், திணைக்களங்களின் நிதி தொடர்பில் கணக்காய்வு செய்யும் பொறுப்பு அரச கணக்காய்வாளருக்கே இருக்கிறது. தற்போது கரம்போட் வழக்கில் தீர்ப்பு வழங்கப்பட்டிருப்பதும் கணக்காய்வாளரின் கணக்காய்வு அறிக்கையை அடிப்படையாகக்கொண்டு இலஞ்ச ஊழல் ஒழிப்பு ஆணைக்குழு தொடுத்த வழக்கின் அடிப்படையிலாகும். அப்படியிருக்கையில் கணக்காய்வாளரின் பொறுப்பு மிகவும் முக்கியமாகும்.