ఆశలపై నీళ్లు..బతుకులో కన్నీళ్లు

ఆత్మహత్య, ప్రాణత్యాగం, బలవన్మరణం.. పేరు ఏదైనా తీరు మాత్రం 'తనను తానే కనుమరుగు చేసుకోవడం!' అనగానే, వినగానే, చదవగానే, రాస్తుండగానే అసలు ఒక మాటగా అనుకోగానే గుండె తల్లడిల్లుతుంది.

- జంధ్యాల శరత్ బాబు

ఆత్మహత్య, ప్రాణత్యాగం, బలవన్మరణం.. పేరు ఏదైనా తీరు మాత్రం 'తనను తానే కనుమరుగు చేసుకోవడం!' అనగానే, వినగానే, చదవగానే, రాస్తుండగానే అసలు ఒక మాటగా అనుకోగానే గుండె తల్లడిల్లుతుంది. తలపుతోనే దడ పుట్టించే ఇది కొంత మందికి తప్పనిసరి ఎందుకవుతోంది? ఎవరి ప్రాణాన్ని వారే తీసేసుకునేంత పరిస్థితి ఏ కారణం వల్ల దాపురిస్తోంది? ఈ రెండూ నాటికీ నేటికీ అంతుపట్టని ప్రశ్నలు. వీటికి సమాధానాలు ఎవరివి వారివే, ఎక్కడివి అక్కడే. 'నీ ప్రాణం నువ్వే తీసుకో' అని ఎవరూ చెప్పరు. సమ్మతం అని ఏ మతమూ చెప్పదు. చట్టం ఎంతమాత్రం ఒప్పుకోదు. సమాజం ఏ విధంగానూ హర్షించదు, అసలే అంగీకరించదు. అయినా అంతటా గంట గంటకీ ఆత్మహత్యలు జరిగిపోతూనే ఉన్నాయంటే ఏమనాలి! ' చర్చోపచర్చలు ఇంకా కొనసాగుతున్నాయి. పరిశీలనలు, పరిశోధనలు తమ పని తాము చేస్తూనే ఉన్నాయి. శాస్త్రవేత్తల ప్రయోగాలు ఎప్పటికప్పుడు సరికొత్త అంశాల్ని వెల్లడి చేస్తూనే వస్తున్నాయి. అభిప్రాయాలు, ఆందోళనలు, స్పందనలు, నిర్ధారణలు,ముందస్తు హెచ్చరికలు సరేసరి. అన్నీ కళ్లముందు కనిపిస్తున్నా 'కనుమరుగు' ఆగడం లేదు. తరచి చూస్తే, లోతుపాతుల్ని గమనించగలిగితే ఎన్ని దృశ్యాలో...ఇంకా ఎన్నెన్ని అదృశ్యాలో!