புதியதொரு அரசியல் மாற்றம்?

இலங்கையில் விடுதலைப் புலிகளுடனான யுத்தம் 2009இல் முடிவுக்குக் கொண்டுவரப்பட்டபோது, ஜனாதிபதியாக மகிந்த ராஜபக்ஷ இருந்தார். அவருடன் அவருடைய சகோதரர் கோட்டபாய பாதுகாப்பு அமைச்சின் செயலாளராக இருந்து யுத்தத்தை முடித்து வைத்தார்.

- லக்ஸ்மன்

பின், அவருடைய ஆட்சி சில வருடங்களில் ரணில், சந்திரிகா, மங்கள சமரவீர, கரு ஜயசூரிய உள்ளிட்ட பட்டாளத்தின் முயற்சியால் மைத்திரிபால சிறிசேன ஜனாதிபதியாக்கப்பட்டு நல்லாட்சி அரசாங்கம் உருவாக்கப்பட்டது. அந்த அரசாங்கத்தில் ரணில் விக்ரமசிங்க பிரதமரானார். தமிழ்த் தேசியக் கூட்டமைப்பு இரா. சம்பந்தன் தலைமையில் எதிர்க்கட்சியாக இருந்து கொண்டு நிபந்தனையற்ற ஆதரவினை அரசுக்கு வழங்கிக் கொண்டிருந்தது.

அவ்வேளையில், தான் ஐக்கிய நாடுகள் மனித உரிமைகள் பேரவையில் இலங்கைக்கு எதிரான தீர்மானம் கொண்டுவரப்பட்ட போது, இலங்கை அரசாங்கம் இணை அனுசரணை வழங்கியிருந்தது. அதன் பின்னர் உருவான அரசியல் சூழல் ரணிலை பதவியிலிருந்து நீக்கி மகிந்த ராஜபக்ஷவை பிரதமராக்கியது. ஆனாலும், அதற்கெதிராக நீதிமன்றம் சென்று மீண்டும் ரணில் பிரதமரானார். பின்னர் நடைபெற்ற ஜனாதிபதித் தேர்தலில் கோட்டபாய ராஜபக்ஷ பெரும்பான்மை சிங்கள மக்களின் வாக்குகளால் ஜனாதிபதியானார். ஸ்ரீலங்கா பொதுஜன பெரமுன பெரும்பான்மை ஆசனங்களால் வென்று ஆட்சியையும் கைப்பற்றியது. அவ்வேளையில், ஐக்கிய நாடுகள் மனித உரிமைப் பேரவையின் தீர்மானத்திலிருந்து தாம் வெளியேறுவதாக கோட்டபாய அறிவித்தார்.

கோட்டபாய மேற்கொண்ட தீர்மானங்கள் மற்றும் நடைமுறைக் காரணங்கள் பலவற்றால் உருவான பொருளாதாரப் பிரச்சினைகளால் அவரது ஆட்சி இல்லாமல் போனது. ரணில் பாராளுமன்றத்தின் மூலம் தெரிவு செய்யப்பட்ட ஜனாதிபதியானார். இவ்வாறு நகர்ந்து கொண்டிருந்த இலங்கை அரசியலில் 2024 செப்டெம்பரில் நடைபெற்ற ஜனாதிபதித் தேர்தலில் பெரும்பான்மையற்ற ஜனாதிபதியாக அனுரகுமார திசாநாயக்க தெரிவு செய்யப்பட்டார். இலங்கை வரலாற்றில் இதுவரை நடைபெற்றிராத ஒரு விடயமாகவும் இது பதிவானது.

அவ்வாறு அவர் தெரிவான பின்னர் பாராளுமன்றத் தேர்தல் அறிவிக்கப்பட்டது. அப்போது, ஏனைய கட்சியினர் பெரும்பான்மையற்ற ஜனாதிபதியாகவே அனுர தெரிவு செய்யப்பட்டிருக்கிறார். நாம் ஆட்சியைக் கைப்பற்றலாம் என்று எண்ணிக் கொண்டனர். ஆனால், நடைபெற்றதோ வேறு விதமாக இருந்தது. மக்கள் விடுதலை முன்னணி தலைமையிலான தேசிய மக்கள் சக்தி பெரும்பான்மையான ஆசனங்களுடன் ஆட்சிக்கு வந்தது, எல்லோரும் போட்டு வைத்திருந்த கணக்குகளும் பிழைத்துப் போயின, அதிலொன்றுதான் ஆட்சிக்கு பங்காளியாவது. அதற்கான வாய்ப்பே இல்லாமல் போனது.