'Afrikaans is almal se taal'

"Ek wil hê Afrikaans moet lewend bly en as ons mense verdruk en mense laat voel asof hulle nie goed genoeg is om die taal te praat nie, kan ek nou vir jou sê gaan dit die grootste krisis vir Afrikaans in die toekoms wees.

- Chantelle Hartebeest

Hierdie is die treffende woorde van die bekroonde radio-omroeper Martelize Brink verlede Saterdag (7 Junie) by een van talle vieringe vir Afrikaans, wat vanjaar sy 100ste jaar as amptelike taal in Suid-Afrika vier.

Die geleentheid het by die Anglo Boere-oorlog-monument op die Laborie-wynlandgoed in die Paarl plaasgevind. Dit is aangebied deur die Anglo Boere-oorlog-trust, wat die ryk en kleurvolle erfenis van Afrikaans saam met die gehoor op die geleentheid vereer het.

Brink het ook as spreker en programleier by die geleentheid opgetree. Sy het benadruk watter groot rol almal daarin speel om dié pragtige taal in die toekoms te laat voortleef.

Sy vertel toe sy jare gelede by RSG begin het, was die gehalte van haar Afrikaans nie op die standaard wat dit moes wees nie. Dit het haar laat voel dat sy nie haar posisie by RSG verdien nie. Brink het dit toe haar werk gemaak om “hogere Afrikaanse literatuur” te lees – veral boeke wat oor “swaar” inhoud gehandel het.