Heibi slaan Progress in spannende halfeindstryd

Heidelberg-rugbyklub het Saterdag na 'n rillerstryd deurgedring tot hul vierde agtereenvolgende SWDRU Superliga A-eindstryd, toe hulle in hul tuishalfeindstryd vir Progress van George naelskraap in die doodsnikke met 45 - 42 verslaan het. Dit, nadat Heibi rustyd met 31-14 in hul Superliga A Top-8 halfeindstryd voor was.

- Clive Pretorius

Voorlangs was dit 'n harde stryd. Dit het woes gegaan in die skrums en hier word Dean Hopp, Progress-stut en boorling van Heidelberg, geen genade deur die Heibi-skrummasjien getoon nie. Foto's: Clive Pretorius

(Clive Pretorius)

Met die hardverdiende sege sal hulle hul fanatiese ondersteuners sekerlik hoogs tevrede stel as hulle in hul vyfde poging daarin kan slaag om as alleenhouers van die gesogte beker gekroon te word.

Beide spanne het hulle alles gegee om nie hul lojale ondersteuners teleur te stel nie en is opwindende, aantreklike rugby opgedis. Daar is 12 keer agter die doellyn gekuier en elke span het 'n halfdosyn drieë ingeryg.

Die wedstryd is gekenmerk met goeie aanvallende spel, maar ook rotsvaste verdediging deur beide spanne. Beide spanne het deurgaans puik hardlooprugby aan hul fanatiese ondersteuners gelewer. Progress moes egter vroeg in die wedstryd al sonder hul ervare losskakel en spelmaker, Eric Zana, klaarkom nadat hy deur Heibi se bulsenter, Marquit September, hard gelak is.