ફેબ્રુઆરીના અંતમાં ફરી માવઠાનું સંકટઃ ખેડૂતોની ચિંતા વધારતી નવી આગાહી

અમદાવાદમાં આજે સવારે ઠંડીની તીવ્રતામાં ઘટાડો નોંધાયો છે.

- 

ફેબ્રુઆરી મહિનાની શરૂઆતથી જ ગુજરાતના વાતાવરણમાં સતત મોટા ફેરફારો જોવા મળી રહ્યા છે અને માવઠાની આગાહીએ જગતના તાતનો જીવ અધ્ધર કરી દીધો છે. કેટલાક હવામાન નિષ્ણાતોએ તેમની નવી આગાહીમાં ફેબ્રુઆરી મહિનાના અંતમાં કમોસમી વરસાદ થવાની શક્યતા વ્યક્ત કરતાં ખેડૂતોની ચિંતા ફરી એક વખત વધી ગઈ છે. અમદાવાદ સહિત રાજ્યભરમાં ગઈ કાલે ઓચિંતો કાતિલ ઠંડીનો ચમકારો અનુભવાયો હતો, પરંતુ આજે મોટા ભાગનાં શહેરોનું લઘુતમ તાપમાન ફરીથી ઊંચકાયું છે. કચ્છનું નલિયા આજે ૮.૬ ડિગ્રી સેલ્સિયસ લઘુતમ તાપમાન સાથે રાજ્યનું સૌથી ઠંડું શહેર બન્યું છે, જ્યારે અમદાવાદમાં ૧૪.૩ ડિગ્રી ઠંડી નોંધાઈ છે.

હવામાન નિષ્ણાતોએ જણાવ્યું છે કે રાજ્યમાં હજુ આગામી બે દિવસ સુધી વાદળછાયું વાતાવરણ રહે તેવી શક્યતા છે. કેટલાંક સ્થળોએ કાળાં ડિબાંગ વાદળાં પણ છવાયેલાં રહેશે.