Aftrede wink vir Juffrou

'n Mens bly sekerlik nie vir 32 jaar by dieselfde skool as jy nie gelukkig is nie. Só gesels Linda Myburgh, 'n geliefde onderwyser by Pietersburg Laerskool (PLS), op die vooraand van haar aftrede.

- Maretha Swanepoel

"My loopbaan het in 1993 by PLS begin. Ek onthou hoe ek destyds vir die hoof, Peet Bredenkamp, gesê het ek is eintlik 'n hoërskoolonderwyser. Hy het my toe verseker ek is 'n gr.4-juffrou. Een van my mooiste oomblikke in die onderwys was toe ek besef het hy was reg - ek hóórt in gr. 4."

Linda het Afrikaans en Bybelkunde vir haar gr.4's aangebied en sy onthou haar eerste dag by die skool toe inspekteurs van die Departement van Onderwys op besoek was. "Die kinders se dissipline en sangvermoë het my beïndruk. Die gewoel op die stoepe was vir my vreemd, maar die kinders se spontane spel was besonders. Die personeel het my dadelik welkom laat voel."

Sy het nooit getwyfel aan haar beroepskeuse nie.

"Om te leer is soos om 'n leer te klim - jy kan nie hoër gaan as jy nie eers die eerste trappie bemeester het nie. Daarom is dit vir my belangrik dat taalvaardighede goed gevestig word."

Benewens haar klaswerk, was Linda ook betrokke by skaak, atletiek, tennis en verskeie kultuuraktiwiteite.

As vakhoof vir Afrikaans het sy dikwels saans tot ná 20:00 gewerk, nadat haar kinders gaan slaap het.