பிரதமர்மோடி இன்று பிரசாரம் தொடக்கம்!

தமிழக சட்டசபைத் தேர்தல் இன்னும் சில மாதங்களில் நடைபெற இருக்கிறது. இந்நிலையில் அரசியல் களம் இப்போதே சூடு பிடிக்கத் தொடங்கி விட்டது.

- 

இன்று மாலை மதுராந்தகத்தில் நடைபெறும் பிரமாண்ட பொதுக்கூட்டத்தில் பிரதமர் நரேந்திர மோடி பரப்புரை நிகழ்த்தி தேர்தல் பிரசாரத்தை தொடங்குகிறார். “ஊழல் தி.மு.க. அரசுக்கு விடை கொடுக்கும் காலம் வந்து விட்டது” என எக்ஸ் வலைதளத்தில் பிரதமர் மோடி பதிவிட்டுள்ளார். தமிழ்நாடு, கேரளா, மேற்கு வங்காளம், அசாம் ஆகிய மாநிலங்களிலும், யூனியன் பிரதேசமான புதுச்சேரியிலும் இன்னும் சில மாதங்களில் தேர்தல் நடைபெற இருக்கிறது. தேர்தல் அட்டவணை மார்ச் மாதம் வெளியிடப்படும் என்று எதிர்பார்க்கப்படுகிறது.

தமிழ்நாட்டில் மு.க. ஸ்டாலின் தலைமையிலான தி.மு.க. ஆட்சியையும், மேற்குவங்காளத்தில் மம்தா பானர்ஜி தலைமையிலான திரிணாமுல் காங்கிரஸ் ஆட்சியையும் வீழ்த்தியே தீர வேண்டும் என கங்கணம் கட்டிக் கொண்டு பிரதமர் மோடி உச்சத் துடிப்புடன் இயங்கி வருகிறார். இத்தேர்தல் திருப்புமுனையை ஏற்படுத்தும் என்று எதிர்பார்க்கப்படுகிறது.

இன்று பிரதமர் நரேந்திர மோடி எக்ஸ் வலைதளத்தில் காலை தமிழில் வெளியிட்டுள்ள பதிவில் "தமிழ்நாடு தேசிய ஜனநாயக கூட்டணியுடன் இருக்கிறது! மதுராந்தகத்தில் இன்று பிற்பகலில் நடைபெறும் பேரணியில் நான் தேசிய ஜனநாயக கூட்டணித் தலைவர்களுடன் கலந்து கொள்ள இருக்கிறேன். ஊழல் திமுக அரசுக்கு விடை கொடுக்கும் காலம் வந்து விட்டது என்று தமிழ்நாடு முடிவு செய்துவிட்டது.

தேசிய ஜனநாயக கூட்டணி ஆட்சியின் சாதனையும் பிராந்திய பெருவிருப்பங்கள் மீதான அதன் அர்ப்பணிப்பும் மாநில மக்கள்மனதில் ஆழமான தாக்கத்தை ஏற்படுத்தியுள்ளன." என்று குறிப்பிட்டுள்ளார்.

தி.மு.க. தரப்பு, அ.தி.மு.க. தரப்பு, தமிழக வெற்றிக் கழகத் தரப்பு உள்ளிட்டவை தேர்தல் நடவடிக்கைகளை முடுக்கிவிட்டுள்ளன.