கோஷ்டி மோதலை தடுக்க சென்ற சப்- இன்ஸ்பெக்டரை கொல்ல முயன்ற 17 வயது சிறுவன் மீது துப்பாக்கிச் சூடு!

குண்டு பாய்ந்து மருத்துவமனையில் அனுமதி , நெல்லை அருகே பதற்றம் - போலீஸ் குவிப்பு!!

- 

நெல்லை மாவட்டம் முக்கூடல் அருகே நள்ளிரவு வாலிபருக்கு அரிவாள் வெட்டு விழுந்தது. இதனை தடுக்க சென்ற போலீசார் மீது தாக்குதல் நடத்தியதால் தற்காப்புக்காக சுட்டதில் சிறுவன் காயமடைந்தான்.

நெல்லை மாவட்டம் முக்கூடலை அடுத்த பாப்பாக்குடி அருகே உள்ள இந்திரா காலனி சமத்துவபுரத்தை சேர்ந்தவர் சண்முகசுந்தரம் மகன் சக்திகுமார் (22). இவர் தற்போது அங்குள்ள ரஸ்தாவூரில் வசித்து வரும் நிலையில் முக்கூடலில் உள்ள ஒரு பாஸ்ட்புட் கடையில் வேலை பார்த்து வருகிறார்.

இந்த நிலையில் நேற்றிரவு சமத்துவபுரத்தை சேர்ந்த துரை மகன் சண்முகசுந்தரம் என்ற சுந்தர் (17), வீராச்சாமி மகன் ராஜேஷ் ஆகியோர் சக்திகுமாருக்கு போன் செய்து ரஸ்தாவூர் பகுதியில் உள்ள குளத்தங்கரைக்கு வரவழைத்துள்ளனர்.

அப்போது நாங்கள் ரவுடிசம் செய்கிறோம் என்று எப்படி நீ போலீசாருக்கு தகவல் தெரிவிக்கலாம் என்று கூறியுள்ளனர். பின்னர் தாங்கள் மறைத்து வைத்திருந்த அரிவாளால் வெட்ட முயன்றபோது சக்திகுமார் தப்பியோடி உள்ளார். அவரை விரட்டி சென்று வெட்டியதில் சக்திகுமாருக்கு காலில் பலத்த வெட்டு விழுந்தது.