Our Shamar bied swanger vroue 'n keuse

'n Ma en dogter van Kleinkrantz, Sharon Coetzee en Shané MacDonald, het onlangs 'n organisasie sonder wins-oogmerk, Our Shamar, gestig waardeur hulle uitreik na swanger jong vroue wat 'n krisisswangerskap beleef en 'n aborsie oorweeg, deur vir hulle alternatiewe/ keuses te bied.

- Alida de Beer

Sharon Coetzee (links) en Shane MacDonald van Our Shamar het hul harte oopgemaak vir swanger vroue met hul rug teen die muur. REGS: Die eerste baba wat Our Shamar ingeneem het wie se ma byna aborsie gekies het weens huislike omstandighede.

Our Shamar, wat beteken 'Ons Beskermer', is gebaseer op Christelike beginsels en is 'n uitvloeisel van 'n droom wat Coetzee gehad het.

"Ek glo die droom kom van die Here af en was 'n bevestiging van wat ek al lank in my hart omdra. Daar is baie ma's met hulle rug teen die muur vir wie aborsie na die enigste uitweg lyk weens hul lewensomstandighede wat verhoed dat hulle hul baba self sal kan versorg en grootmaak. Our Shamar wil vir hierdie vroue 'n keuse bied," sê Coetzee, 'n plaaslike gesondheidswerker.