Evergreens-agttal knak Crusaders

Evergreens is die enigste span wat die afgelope Saterdag 'n bonuspuntoorwinning kon behaal ná nog 'n indrukwekkende vertoning in die SWD-rugbyunie se Top 8-uitklopkompetisie.

- Hugo Redelinghuys

Die Pacaltsdorpers het na 'n aanvanklik stadige begin geleidelik na 'n hoër rat oorgeskakel, voorlangs met sy groot gewigsvoordeel oorheers en die besoekende Crusaders redelik maklik met 43 - 17 omgeklink.

Crusaders het die tuisspan binne die eerste paar minute met 'n drie geskok en dit vroeg in die tweede helfte herhaal, maar Evergreens het koelkop gebly, beheer oorgeneem en veral in die vaste spel sy stempel afgedruk.

Crusaders het gesukkel in die skrums en in die vaste los. Dit het soms desperate keerwerk gekos om die Evergreens-kolosse van die doellyn af weg te hou. Dit het hulle nogal goed reggekry, maar mens kan ook net soveel kere jou lyf op die spel plaas teen sulke groot kanonne. Dié damwal moes een of ander tyd bars.