பிரதமர் நரேந்திர மோடி - சி.பி.ராதாகிருஷ்ணன் சந்திப்பு

மத்தியில் ஆளும் பாஜக தலைமையிலான தேசிய ஜனநாயகக் கூட்டணி சார்பில் குடியரசு துணைத் தலைவர் தேர்தல் வேட்பாளராக அறிவிக்கப்பட்ட மகாராஷ்டிர ஆளுநர் சி.பி.ராதாகிருஷ்ணன், தில்லியில் திங்கள்கிழமை பிரதமர் நரேந்திர மோடியைச் சந்தித்துப் பேசினார்.

- 

புது தில்லி, ஆக. 18:

முன்னதாக, ஞாயிற்றுக்கிழமை பிரதமர் மோடி தலைமையிலில் நடைபெற்ற பாஜக ஆட்சி மன்றக் குழு கூட்டத்தில் குடியரசு துணைத் தலைவர் தேர்தல் வேட்பாளராக சி.பி.ராதாகிருஷ்ணன் தேர்வு செய்யப்பட்டார்.

இந்நிலையில், தேசிய ஜனநாயக கூட்டணித் தலைவர்கள் உள்பட பல்வேறு தரப்பு தலைவர்களைச் சந்திக்கும் நோக்கில் சி.பி.ராதாகிருஷ்ணன் தில்லிக்கு திங்கள்கிழமை வந்தார். பிரதமர் நரேந்திர மோடியை அவர் சந்தித்துப் பேசினார்.

இந்தச் சந்திப்பு குறித்து பிரதமர் மோடி 'எக்ஸ்' வலைதளத்தில் வெளியிட்ட பதிவில், 'சி.பி. ராதாகிருஷ்ணனைச் சந்தித்தேன். தேசிய ஜனநாயக கூட்டணியின் குடியரசு துணைத் தலைவர் வேட்பாளராகத் தேர்வு செய்யப்பட்டதற்கு வாழ்த்துத் தெரிவித்தேன். பொதுச் சேவையில் நீண்டகாலம் பணியாற்றியுள்ளார். பல்வேறு துறைகளில் நீண்ட அனுபவம் கொண்ட அவரின் பணி தேசத்துக்கு மேலும் சிறந்த பங்களிப்பைச் செலுத்தும். அவரது தேசப் பணி அதே அர்ப்பணிப்பு உணர்வுடன் தொடரும்' என்று கூறியுள்ளார்.