எந்நன்றி கொன்றார்க்கும்...

பாறப்புறத் இராதாகிருஷ்ணன்

- 

மனிதனின் உயர்ந்த பண்புகளாக சான்றோர்களால் குறிப்பிடப்படுவது, நேர்மை, சகிப்புத்தன்மை, பொறுமை, பணிவு, மனிதநேயம், இன்சொல் பேசல், கருணை, இரக்கம், புறங்கூறாமை, நன்றியுணர்வு ஆகியவை. இதில், நன்றியுணர்வு என்பது வேகமான காலஓட்டத்தில் நினைவுபடுத்தப்பட வேண்டிய ஒரு பண்பாக மாறிவிட்டது.

தினையளவு நன்மை கிடைத்தாலும், அதனால் தாம் பெற்ற பயனை உணர்ந்து, அதனை பனையளவாக நினைத்து நன்றி பகர்வது நல்லடியார்களின் நன்னெறியாகும். ஒருவர் பிறருக்கு செய்யும் நல்ல செயல்கள் என்றும் நன்மை பயக்கும். இத்தகைய நல்ல செயல்களே 'நன்று' என்பதாகும். 'நன்று' என்ற சொல்லின் அடிப்படையிலேயே 'நன்றி' என்ற சொல்லும் பிறக்கிறது.

'நன்றி' உரைத்தல் என்பது மனிதகுலம் கண்ணியமாய் மண்ணகத்தில் வாழ்வதற்கு நனி சிறந்த நடைமுறைப் பண்பாகும். இப்பண்பானது நாகரிக வளர்ச்சியின் அடையாளமாக, ஒருவரின் பண்பட்ட தன்மையை எடுத்துக்காட்டும்.

நம் வாழ்வு உயர, நன்மைகள் பல செய்த நல்லவர்களை நம் மனதில் கல்வெட்டு எழுத்துகளாய் பதிந்து வைத்துக் கொண்டு, நேரம் வரும்போதெல்லாம் அவரின் அச் செய்கைகளை பிறர் அறியும் வண்ணம் பாராட்டி உரைக்க வேண்டும். அது அவருக்கு பெரிய ஊக்க சக்தியாக இருந்து, பிறர் மகிழ்ச்சியடைய இன்னும் பல நற்காரியங்களைப் புரிவார்.