அதிர்ஷ்டத்தில் தொடங்கி... தற்காலிக நிறுத்தம்!

துப்பாக்கிச் சூட்டில் ஈடுபடுவதைவிட கூடுதல் வரிப் போரை நடத்த அமெரிக்க அதிபர் டிரம்ப் விரும்பினார். எனினும், உலக நாடுகளின் பதிலடியைத் தொடர்ந்து, "கூடுதல் வரிப் போர் நிறுத்தத்தை டிரம்ப் அறிவித்தார்.

- முனைவர் டி.கே. ஜயராமன்

அண்மைய உலகப் பொருளாதார வரலாற்றில் மிகவும் குழப்பமான மாதம், கடந்த ஏப்ரல் மாதமாகும். அமெரிக்கா இதுபோன்ற ஒரு போரை ஒருபோதும் தொடங்கியதில்லை. அமெரிக்காவின் இந்த வர்த்தகப் போரில் ஏவுகணைகளாக உலகின் பிற பகுதிகளிலிருந்து இறக்குமதி செய்யப்படும் பொருள்களின் மீதான வரிகள் பயன்படுத்தப்பட்டன. இந்த வரிகளில், விரைவான மாற்றங்கள் செய்ததன் காரணமாக குழப்பம் ஏற்படுகிறது. இறக்குமதிகள் உள்ளீடுகளாகவோ அல்லது ஏற்றுமதிக்கான இறுதி செய்யப்பட்ட பொருள்களின் உற்பத்திக்கான இடைநிலைப் பொருள்களாகவோ கண்டறியப்படும் போது விலக்குகள் வழங்கப்படுகின்றன. குறுகிய காலத்தில் ஏற்படும் வர்த்தக வரி மாற்றங்கள், ரத்துகள், விலக்குகள் குழப்பத்துக்கு மட்டுமல்லாமல், 'குழப்பம்... குழப்பத்திற்கு மேல் குழப்பம்' என்ற சூழ்நிலைக்கும் வழிவகுக்கிறது.

2024 - ஆம் ஆண்டின் நடுப்பகுதியில் டொனால்ட் டிரம்ப் குடியரசுக் கட்சி வேட்பாளராக வேட்புமனு தாக்கல் செய்த நாளிலிருந்து இந்த குழப்பத்துக்கான விதைகள் விதைக்கப்பட்டன. தேர்தலில் அவர் வெற்றி பெற்றதைத் தொடர்ந்து, ஜனவரி 20, 2025 - ஆம் தேதி பதவியேற்ற நாளிலிருந்து குழப்பம் தொடங்கியது. ஏப்ரல் 2 -ஆம் தேதி, டிரம்ப் பரஸ்பர இறக்குமதி வரிகள் என்று அழைக்கப்படும் கடுமையான வரிகளை அறிவித்தபோது, அது உச்சகட்டத்தை அடைந்தது. இது உலகம் அனுபவித்து வந்த சுதந்திர வர்த்தகத்தின் அடித்தளத்தை உலுக்கியது. குறிப்பாக சீனாவிலிருந்து, தொடர்ச்சியான பழிவாங்கும் நடவடிக்கைகள் பின்பற்றப்பட்டன. ஏப்ரல் 9 அன்று தற்காலிக 90 நாள்கள் கூடுதல் வரிப்போர் நிறுத்தம் அறிவிக்கப்பட்டது.