பெங்களூரு நெரிசல் துயர சம்பவம்: ஆட்டமும் அலட்சியமும்!

ராயல் சேலஞ்ச் சர்ஸ் பெங்களூரு (ஆர்சிபி) அணி 18 ஆண்டுகால ஐபிஎல் கிரிக்கெட் போட்டி வரலாற்றில், முதல் முறையாக சாம்பியன் பட்டத்தை வென்ற கொண்டாட்ட நிகழ்ச்சியின்போது ஏற்பட்ட கூட்ட நெரிசல் 11 உயிர்களை அகாலமாகப் பறித்திருக்கிறது.

- நமது நிருபர்

பெங்களூரு, ஜூன் 5:

தகுந்த திட்டமிடல் இல்லாமல், இரவோடு இரவாக கர்நாடக அரசு அறிவித்த விதான சௌதா வளாக பாராட்டு விழாவும், கர்நாடக கிரிக்கெட் சங்கத்தின் சார்பில் சின்னசாமி கிரிக்கெட் மைதானத்தில் ஏற்பாடு செய்யப்பட்ட ஆர்சிபி அணிக்குப் பாராட்டு விழாவும் நிலைமையை மோசமாக்கின.

விடிய, விடிய நடந்த ரசிகர்களின் கொண்டாட்டங்கள், பொது இடங்களில் வெடிக்கப்பட்ட பட்டாசுகள், ஆர்ப்பரித்த ரசிகர்கள், கன்னடக் கொடி மற்றும் ஆர்சிபி கொடிகளுடன் வாகனங்களில் பவனி வந்தவர்களை காவல் துறையினர் கட்டுப்படுத்தி வந்தனர். இதனால் பிற பாதுகாப்புப் பணிக்குப் போதுமான காவலர்களை ஈடுபடுத்த முடியாமல் நகர காவல் துறை திணறியது.

இந்நிலையில், புதன்கிழமை காலை முதலே கொண்டாட்டங்கள், பாராட்டு விழாக்கள் நடைபெறும் இடங்களை நோக்கி ரசிகர்கள் குவியத் தொடங்கினர்.

வாகனங்களைத் தவிர்க்குமாறு காவல் துறை கேட்டுக்கொண்டதால், மெட்ரோ ரயில்களில் ரசிகர்கள் படையெடுத்தனர். இதனால் மெட்ரோ ரயில்கள் நிரம்பி வழிந்தன. இளைஞர்களின் ஆரவாரக் கூச்சல், முழக்கங்களால் பிற பயணிகளால் மெட்ரோ ரயிலில் பயணிக்க முடியவில்லை.

பேருந்துகளிலும் மக்கள் குவிந்த வண்ணம் இருந்தனர். இதையடுத்து காவல் துறை, விதான சௌதாவில் இருந்து அம்பேத்கர் வீதி வழியாக சின்னசாமி மைதானம் வரை நடக்கவிருந்த கிரிக்கெட் வீரர்களின் பேருந்து உலா நிகழ்ச்சியை ரத்து செய்தது.