காத்திருக்கும் பொருளாதாரச் சவால்கள்!

தமிழ்நாடு சட்டப்பேரவை பொதுத் தேர்தலில் எவருக்கும் பெரும்பான்மை கிடைக்காத நிலையில், இரண்டாவது இடத்தை திமுகவும், மூன்றாவது இடத்தை அதிமுகவும் பெற்று, பெரும்பான்மை இல்லாத முதலிடத்தைப் பெற்றது தமிழக வெற்றிக் கழகம்.

- முனைவர் வைகைச்செல்வன்

தமிழ்நாடு சட்டப்பேரவை பொதுத் தேர்தலில் எவருக்கும் பெரும்பான்மை கிடைக்காத நிலையில், இரண்டாவது இடத்தை திமுகவும், மூன்றாவது இடத்தை அதிமுகவும் பெற்று, பெரும்பான்மை இல்லாத முதலிடத்தைப் பெற்றது தமிழக வெற்றிக் கழகம். சுமார் 60 ஆண்டுகால திராவிட ஆட்சிகளுக்கு மாற்றாக நடிகர் விஜய்யின் தமிழக வெற்றிக் கழகம் ஓர் அரசியல் மாற்றத்தை ஏற்படுத்தியுள்ளது.

திராவிட இயக்கங்கள் சாதித்த விளைநிலங்களில் இருந்துதான் இந்த வித்துகள் முளைத்திருக்கின்றன என்பதை நாம் மறுதலித்துவிட முடியாது. திராவிட இயக்கங்கள் போட்ட சமூகநீதிப் பாதையில் இருந்துதான் இந்த இளம் தளிர் பூத்துக் குலுங்கி இருக்கிறது என்பதை மறந்துவிட முடியாது.

திராவிட இயக்கங்கள் விதைத்திட்ட சமூகநீதி, தமிழ் வளர்ச்சி, பட்டியலினத்தவர்கள் மற்றும் பிற்படுத்தப்பட்ட மக்களுக்கான இடஒதுக்கீடு மற்றும் அடித்தட்டில் இருப்பவர்களும் அமைச்சராக முடியும் என்கிற ஜனநாயகத்தின் மாபெரும் கனவைத் தந்திட்ட திராவிட இயக்கங்களின் பள்ளிக்கூடத்தில் பாலபாடம் பயின்றவர்கள்தான் இன்றைய வளரும் தலைமுறையினர். அதே பாதையில் இவர்கள் பயணித்தாலும் ஜாதி கட்டமைப்புகளைக் கடந்து பணபலம் அற்று யாருமே அரசியல் பின்புலமற்ற குடும்பத்தைச் சார்ந்து எளியவர்கள் அரசியலில் கோலோச்ச முடியும் என்பதை நிரூபித்த பெரியார் ஈ.வெ.ரா.வின் கொள்கைகள், முன்னாள் முதல்வர் அண்ணாவின் சித்தாந்தங்கள் இன்னும் மலர்ந்து கொண்டுதான் இருக்கிறது.

காலப்போக்கில் சட்டப்பேரவைத் தொகுதிகளில் ஜாதிகள் ரீதியாக வேட்பாளர்கள் நிறுத்தப்படுவதும், பணபலம் தேர்தலில் பாதாளம் வரை பாய்வதை நோக்கி பயணப்பட்டுப் போனார்கள். அவற்றை உடைத்தெறிந்து புதியவர்களைத் தேர்ந்தெடுத்து விட்டார்கள் மக்கள். தேர்தல் கொண்டாட்டங்கள் ஓய்ந்த நிலையில், கூட்டணி அமைச்சரவையும் அமைக்கப்பட்டு இளையவர்கள், பட்டியலினத்தவர்கள், பெண்கள் என்று பலதரப்பட்ட புதியவர்களுக்கான வாய்ப்பை ஜனநாயகம் வழங்கியிருக்கிறது.