என் தாயாரை அவமதித்தவர்களை பிகார் மக்கள் மன்னிக்க மாட்டார்கள்

காங்கிரஸ்-ஆர்ஜேடி மீது பிரதமர் மோடி தாக்கு

- 

பாட்னா, செப். 2: 'என் தாயாரை அவமதித்தற்காக, காங்கிரஸ்-ராஷ்ட்ரீய ஜனதா தளம் (ஆர்ஜேடி) கட்சிகளை நான் வேண்டுமானால் மன்னிக்கலாம்; ஆனால், பிகார் மக்கள் ஒருபோதும் மன்னிக்க மாட்டார்கள்' என்று பிரதமர் நரேந்திர மோடி தெரிவித்தார்.

பிகாரில் மக்களவை எதிர்க்கட்சித் தலைவர் ராகுல் காந்தி நடத்திய வாக்குரிமைப் பயணம் அண்மையில் நிறைவடைந்தது. தர்பங்காவில் நடைபெற்ற இப்பயண நிகழ்ச்சியில், பிரதமர் மோடி மற்றும் அவரது தாயார் குறித்து அவதூறு கருத்துகள் தெரிவிக்கப்பட்டதாக சர்ச்சை எழுந்தது.

இந்த விவகாரத்தில் காங்கிரஸ்-ஆர்ஜேடியைக் கடுமையாக சாடி வரும் பாஜக, ராகுல் மன்னிப்புக் கேட்க வேண்டும் என வலியுறுத்தி வருகிறது.

இந்நிலையில், இந்த சர்ச்சை குறித்து பிரதமர் மோடி முதல்முறையாக எதிர்வினையாற்றியுள்ளார். பிகாரில் மகளிர் சுய உதவிக் குழுக்களுக்கான கூட்டுறவு சங்கத்தை காணொலி வழியாக செவ்வாய்க்கிழமை தொடங்கி வைத்துப் பேசிய அவர், மறைந்த தனது தாயார் மீதான அவதூறு மிக வேதனையளிப்பதாக குறிப்பிட்டார்.