போலீஸ் தனிப்படைகள் கலைப்பு

சிவகங்கை மாவட்டம், திருப்புவனம் கோயில் காவலாளி போலீஸாரால் தாக்கப்பட்டு உயிரிழந்த சம்பவம் எதிரொலியாக, காவல் நிலையங்களில் உரிய அனுமதியின்றி செயல்படும் தனிப்படைகளைக் கலைக்கும்படி தமிழக காவல் துறை தலைமை இயக்குநர் (டிஜிபி) சங்கர் ஜிவால் உத்தரவிட்டுள்ளார்.

- 

சென்னை, ஜூலை 2: சிவகங்கை மாவட்டம், திருப்புவனம் கோயில் காவலாளி போலீஸாரால் தாக்கப்பட்டு உயிரிழந்த சம்பவம் எதிரொலியாக, காவல் நிலையங்களில் உரிய அனுமதியின்றி செயல்படும் தனிப்படைகளைக் கலைக்கும்படி தமிழக காவல் துறை தலைமை இயக்குநர் (டிஜிபி) சங்கர் ஜிவால் உத்தரவிட்டுள்ளார்.

திருப்புவனம் அருகே மடப்புரம் பத்ரகாளியம்மன் கோயிலுக்குச் சென்ற பெண் பக்தரின் நகைகள் காணாமல் போனதாக எழுந்த புகாரில் விசாரணைக்கு அழைத்துச் செல்லப்பட்ட கோயில் காவலாளி அஜித்குமார், போலீஸார் தாக்கியதில் உயிரிழந்தார்.

மானாமதுரை காவல் துணைக் கண்காணிப்பாளரின் கீழ் பணிபுரியும் தனிப்படை காவலர்களே அஜித்குமாரை தாக்கியதாகக் கூறப்படுகிறது.

இந்த சம்பவம் தமிழகம் முழுவதும் அதிர்ச்சியை ஏற்படுத்தியது. இதில் தொடர்புடைய போலீஸார் ஐந்து பேர் கைது செய்யப்பட்டு, சிறையில் அடைக்கப்பட்டுள்ளனர். சிவகங்கை மாவட்ட காவல்கண்காணிப்பாளர் அஷிஷ் ராவத் காத்திருப்போர் பட்டியலுக்கு மாற்றப்பட்டார். மானாமதுரை காவல் துணைக் கண்காணிப்பாளர் சண்முகசுந்தரம் பணி இடை நீக்கம் செய்யப்பட்டார்.