மருத்துவர்களின் சேவை மகத்தானது!

மனித உயிர் காக்கும் மருத்துவர்களின் ஆயுள்காலம், மற்றவர்களை விட பதினான்கு ஆண்டுகள் குறைவு என்றால் ஆச்சரியமாக இருக்கிறது.

- மருத்துவர் அ. வேணி

ஆம்! இந்தியாவில் ஒரு சராசரி நபரின் ஆயுள்காலம் 69லிருந்து 72 வயது வரையில் வரையறுக்கப்பட்டிருப்பது பலரும் அறிந்த ஒன்று. இந்திய மருத்துவர்களின் சராசரி ஆயுள்காலம் 55லிருந்து 59 வயது வரைதான். இதை ஒப்பிடும்போது, மற்றவர்களை விட பதினான்கு ஆண்டுகள் குறைவு. இது குறித்து நாம் அக்கறை கொள்ள வேண்டிய நேரம் இது.

மருத்துவ ஆலோசனைக்காக வந்த இரு நோயாளிகள் ஒருவர் வங்கியில் வேலை செய்பவர், மற்றொருவர் சார்ட்டர்டு அக்கவுண்டண்ட் கூறியவைதான், இவ்வாறு சிந்திக்க வைத்தது.

அந்த சார்ட்டர்டு அக்கவுண்டண்ட்டிடம், உடற்பயிற்சி செய்யுங்கள் என்று சொன்னபோது, என்னுடைய வாடிக்கையாளர்கள், என்னிடமிருந்து என் ஆரோக்கியத்தை எடுத்துக் கொண்டு போய் விடுகிறார்கள், அதாவது, கடைசி நிமிஷத்தில் எல்லா வேலைகளையும் என்மீது சுமத்துவதால், ஓய்வின்றி உழைக்க வேண்டியுள்ளது. அதனால் உடற்பயிற்சி செய்ய முடியவில்லை என்றார் அவர்.

அப்போது தான் தெரிந்தது நாள் முழுவதும் நோயாளிகளின் பிணிகளைக் காது வழியே கேட்டு, அதை நீக்க உடலாலும் மனதாலும் தொடர்ந்து பாடுபடும் மருத்துவர்களின் நிலை என்ன?

வங்கியில் பணிபுரியும் மற்றொரு நோயாளி கூறுகையில் சிறு வயதிலிருந்து டாக்டர்கள் எல்லோருக்கும் இறப்பு என்பதே கிடையாது. அவர்கள் நீண்ட காலம் வாழ்வார்கள் என்று தவறாக நினைத்துக் கொண்டிருந்தேன். ஆனால், அவர்களுக்கும் பிறரைப் போல் பிரச்னைகள் இருப்பதோடு மட்டுமல்லாமல், அன்றாடம் நோயாளிகளின் துயரைத் தீர்க்க வேண்டியிருப்பதால், சிலர் தம் குடும்பத்தைக் கூட கவனிக்க இயலாமல் தவிக்கின்றனர் என்றார்.

இவ்வாறு ஒவ்வொரு தனி நபரும் தம்மை நோயிலிருந்து காத்து நிற்கும் மருத்துவர்களின் நலன் குறித்து சிந்திக்கும் போதுதான், மருத்துவர்களின் ஆயுள்காலம் நீட்டிக்கப்படும். மருத்துவர்களாகிய நாம் மருத்துவ தினத்தன்று, இதைப் பற்றி சற்று சிந்திப்போம்?

மாணவப் பருவம், பயிற்சி மருத்துவர்கள், முதல் நிலை மருத்துவர்கள், சிறப்பு மருத்துவ நிபுணர்கள் என்று, மருத்துவர்களின் காலவரையற்ற சேவை, மிக உன்னதமான சேவை என்பதை எவராலும் மறுக்க முடியாது. மக்கள் தொண்டே மகேசனுக்குச் செய்யப்படும் தொண்டாக பணிபுரியும் மருத்துவர்களின் நிலை மிகவும் வேதனைகலந்த ஒன்றாக மாறுகிறது.