தொலைநோக்குப் பார்வை தெரிகிறது!

ஒருபுறம் அமெரிக்க அதிபர் டொனால்ட் டிரம்ப்பின் கூடுதல் இறக்குமதி வரி அச்சுறுத்தல், இன்னொருபுறம் பாகிஸ்தான் பயங்கரவாதத் தாக்குதலைத் தொடர்ந்து நடைபெற்ற இந்தியா-பாகிஸ்தானுக்கு இடையேயான மோதல் - அதனால் முக்கியமான பொருளாதார நிகழ்வு ஒன்று போதிய கவனம் பெறாமல் போய்விட்டது.

- 

2021 ஆகஸ்ட் மாதம் தொடங்கிய இந்தியா-பிரிட்டன் தடையற்ற வர்த்தக ஒப்பந்தப் பேச்சுவார்த்தை வெற்றிகரமாக முடிந்திருப்பது சர்வதேச வர்த்தகத்தில் மிகப்பெரிய திருப்புமுனை.

உலகின் இருதரப்புப் பேச்சுவார்த்தை தொடங்கும்போது ஐந்தாவது பெரிய பொருளாதாரமாக இருந்த பிரிட்டனை, ஒப்பந்தம் கையொப்பமாகி இருக்கும் இன்றைய நிலையில் ஆறாவது இடத்துக்குத் தள்ளி ஐந்தாவது இடத்துக்கு இந்தியா முன்னேறியது; பின்னர் ஜப்பானை முந்தி நான்காவது இடத்துக்கு முன்னேறியுள்ளது. பேச்சுவார்த்தை தொடங்கும்போது இந்தியாவுக்கும் பிரிட்டனுக்கும் இடையேயான வர்த்தகம் 17.5 பில்லியன் டாலர் என்றால், இப்போது அதுவே 57 பில்லியன் டாலராக அதிகரித்திருக்கிறது.

அதிபர் டிரம்ப்பின் இறக்குமதி வரி குறித்த அறிவிப்புதான், மூன்று ஆண்டுகளாக எந்தவித முடிவும் எட்டப்படாமல் இழுத்தடித்துக் கொண்டிருந்த பேச்சுவார்த்தை வெற்றிகரமாக முடிவடைந்ததற்குக் காரணம். அதுமட்டுமல்ல, பிரிட்டனின் பொருளாதாரம் இப்போது எதிர்கொள்ளும் சவால்களும்கூட, இதுபோன்ற ஒப்பந்தத்தை ஏற்படுத்திக் கொள்ளவும், சில சமரசங்களுக்கு உடன்படவும் அந்த அரசை நிர்பந்தித்தன என்றுதான் கூற வேண்டும்.