கல்வியாளர்கள், ஆசிரியர்கள் கருத்து

தமிழக அரசு வெளியிட்டுள்ள பள்ளிக் கல்விக் கொள்கையின் சில அம்சங்களுக்கு கல்வியாளர்கள் ஆதரவு தெரிவித்திருந்தாலும், மாதிரிப் பள்ளிகள், பிளஸ் 1 பொதுத் தேர்வு ரத்து உள்ளிட்ட சில அம்சங்கள் கடுமையான விமர்சனங்களுக்கு உள்ளாகியுள்ளன.

- 

சென்னை, ஆக. 8:

பொதுப் பள்ளிக்கான மாநில மேடை அமைப்பின் பொதுச் செயலர் பிரின்ஸ் கஜேந்திர பாபு: தமிழக அரசு மாநில கல்விக் கொள்கையை வெளியிட்டிருப்பது பிற மாநிலங்களுக்கு பெரும் நம்பிக்கை தரும் செயல்பாடு. மாநிலத்தின் மொழியான தமிழும், தேவையின் அடிப்படையிலில் ஆங்கிலமும் என்ற அடிப்படையில் இருமொழிக்கொள்கை அரசின் மொழிக் கொள்கையாக இருக்கும் என்பது தெளிவுபடுத்தப்பட்டுள்ளது.

மேல்நிலைப் பள்ளி படிப்பில் இரண்டாம் ஆண்டு மட்டுமே வாரியத் தேர்வு இருக்கும் என்பதும் வளர்ந்த குழந்தைகளின் உளவியலை உணர்ந்து எடுக்கப்பட்டுள்ள நியாயமான நடவடிக்கை. முன்னாள் முதல்வர் கருணாநிதியின் சமச்சீர் கல்விக் கோட்பாட்டுக்கு நேரெதிராக மாதிரிப் பள்ளிகள் மற்றும் தகைசால் பள்ளிகள் என்ற அடிப்படையில் பள்ளிக் கல்விக் கட்டமைப்பில் உள்ள பாகுபாடு, சமமான கற்றல் வாய்ப்பை அனைவருக்கும் உறுதி செய்யவில்லை. இத்தகைய கட்டமைப்பு சமத்துவத்துக்கும், சமூகநீதிக்கும் எதிரானது.

நிரந்தரப் பணியில் அமர்த்தப்படுவது கற்றல், கற்பித்தல் செயல்பாட்டுக்கு அடிப்படைத் தேவையாகும். இதுகுறித்து கொள்கையில் எந்த அறிவிப்பும் இல்லை. ஆசிரியர்கள் அல்லாத தன்னார்வலர்கள், தொண்டு நிறுவனங்கள் பள்ளிச் செயல்பாட்டில் தலையிடுவது சரியல்ல. மக்கள் செலுத்தும் வரியில் இருந்து கட்டணமில்லாக் கல்வியை அனைவரும் பெறுவதே கண்ணியமிக்க வாழ்வுரிமை.