மன்னித்தல் என்னும் மாமருந்து!

அறிவிற்சிறந்த சான்றோர் அப்படி நினைக்காமல், தமக்கு தீமை செய்தவரையும் மன்னித்து அவர் வெட்கப்படும்படியாக அவருக்கு நன்மையே செய்துவிடுவார்கள். இங்கே சான்றோரின் உயர் பண்பும் பெருமையும் அவருடைய மன்னித்தல் என்னும் குணத்தால் வெளிப்படுகிறது.

- மா. கல்யாண மோகன்

தெரிந்து செய்வது தப்பு... தெரியாமல் செய்வது தவறு. அதாவது ஒரு செயலை நாம் செய்யும்போது, அதை நாம் செய்வது சரியல்ல அல்லது முறையல்ல என்று அறிந்த பிறகும் அதை தெரிந்தே செய்வது தப்பு. ஆனால் ஒரு செயலை நாம் செய்யும்போது நாம் இதை செய்வது சரியா, சரியற்றதா என்று அறியாமல் சிந்திக்காமல் செய்வது தவறு. தப்போ அல்லது தவறோ அதைச் செய்தவர் எவராயினும் அதை செய்ததால் அவருக்கும் மற்றவர்களுக்கும் ஏற்பட்ட பின்விளைவுகளை அவர் உணரும்படி செய்து அவரை மன்னித்து நல்வழிப்படுத்துதலே சான்றோர்க்கு அழகு. அவர் திருந்திவாழ சந்தர்ப்பம் ஏற்படுத்திக் கொடுப்பதே 'மன்னித்தல்' என்னும் மாபெரும் குணமாகும். மன்னித்தல் என்பதே மாந்தர்க்கு வேண்டிய உயர்ந்த குணம் என்பது சான்றோர் வாக்கு.

இதைத்தான் வள்ளுவர், "இன்னா செய்தாரை ஒறுத்தல் அவர்நாண நன்னயம் செய்து விடல்" என்றார்.

அதாவது, நமக்கு ஒருவன் தீமை செய்கிறான். அவனைத் தண்டிக்க வேண்டும் என்று நினைத்தால், அவன் வெட்கப்படும்படியாக, அவனுக்கு நன்மைகளைச் செய்துவிடுவது நல்லது. இது பண்பாளர் செயல் என்பதாகும். அதாவது சாதாரண மனிதர்கள் பிறரொருவர் தமக்கு தீமை செய்யும்போது உணர்ச்சிவசப்பட்டு அவர்களைத் தண்டிக்க நினைப்பார்கள். ஆனால், அறிவிற்சிறந்த சான்றோர் அப்படி நினைக்காமல், தமக்கு தீமை செய்தவரையும் மன்னித்து அவர் வெட்கப்படும்படியாக அவருக்கு நன்மையே செய்துவிடுவார்கள். இங்கே சான்றோரின் உயர் பண்பும் பெருமையும் அவருடைய மன்னித்தல் என்னும் குணத்தால் வெளிப்படுகிறது.

இது போன்று, இவ்வுலகில் தங்களுக்கு இழைத்த தீமைகளையெல்லாம் பொறுத்து, தவறு செய்தவர்களையும் மன்னித்து, அவர்களை நல்வழிப்படுத்தி மற்றவர்களுக்கு எடுத்துக்காட்டாய் வாழ்ந்து மறைந்த மாமனிதர்கள் பலர். அவர்களில் ஒருவர் நம் தேசப்பிதா காந்தியடிகள் ஆவார்.

ஆங்கிலேயர்கள் வியாபாரம் செய்யும் நோக்கில் இந்தியாவுக்குள் நுழைந்தார்கள். இந்தியாவின் பல பகுதிகளையும் வேறு வேறு மன்னர்கள் ஆண்டு வந்ததாலும் அவர்கள் தம்மிடையே ஒற்றுமையின்றி வேறுபட்டு இருந்ததாலும் அந்த பலவீனத்தை வியாபாரம் செய்ய வந்தவர்கள் தங்களுக்கு சாதகமாக மாற்றிக்கொண்டனர். அவன் நாட்டைப் பிடித்துக்கொள்ள வேண்டும் என்ற நோக்கில் தம்மை எதிர்த்த ஆயிரமாயிரம் இந்திய மக்களைக் கொன்று குவித்தான். வெள்ளையனை விரட்ட சுதந்திரப் போராட்டம் வெடித்தது.