மாற்றத்தைப் பார்வையில் தொடங்குவோம்!

சமூகத்தின் அசைக்க முடியாத அடித்தளம் கல்வி.

- பழ. அசோக்குமார்

எளிய மக்களுக்கு கல்வி எட்டாக்கனியாக இருந்த காலத்தில் அதை சாமானியர்களின் பிள்ளைகளும் எளிதில் இலவசமாய்ப் பெற வசதியாக அறிவுக் கதவுகளைத் திறந்து வைத்தவை அரசுப் பள்ளிகள். இன்றைய மாபெரும் ஆளுமைகள், அறிவியலாளர்கள், மருத்துவர்கள் எனப் பலரும் அரசுப் பள்ளி எனும் கருவறையில் உதித்தவர்களே. ஆனால், அண்மைக் காலமாக சமூக ஊடகங்களில் அரங்கேறி வரும் சில நிகழ்வுகள் நம் மனசாட்சியை உலுக்கத் தொடங்கியுள்ளன.இன்றைய எண்ம (டிஜிட்டல்) உலகில், ஒரு சிறு தவறு நொடிப்பொழுதில் உலகெங்கும் பரவிவிடுகிறது. சில அரசுப் பள்ளி மாணவர்கள் வகுப்பறையில் செய்யும் முதிர்ச்சியற்ற செயல்களையும், விளையாட்டாகச் செய்யும் தவறுகளையும் காணொலியாக எடுத்து, அதைப் பொதுவெளியில் பகிர்ந்து கேலி செய்வது ஒரு நாகரிகமற்ற போக்காக வளர்ந்து வருகிறது.

ஒருசில மாணவர்களின் செயல்பாடுகளை வைத்து, ஒட்டுமொத்த அரசுப் பள்ளி அமைப்பையே கொச்சைப்படுத்துவது எவ்வளவு பெரிய அநீதி? அந்தக் காணொலிகளை ரசித்துச் சிரிக்கும் நாம், அந்தச் சிறுவனின் அல்லது சிறுமியின் எதிர்காலத்தை அந்தச் சிரிப்பால் சிதைக்கிறோம் என்பதை உணர்வதில்லை.

அரசுப் பள்ளிக்கு வரும் பெரும்பாலான மாணவர்கள் வறுமையின் பிடியிலிருந்தும், போதிய வசதிகள் இல்லாத சூழலிலிருந்தும் வருபவர்கள். பல மாணவர்களின் வீடுகளில் அவர்களுக்குப் பாடங்களைக் சொல்லிக் கொடுக்கவோ, உலக நடப்புகளைப் புரியவைக்கவோ வழிகாட்டிகள் இல்லை. அவர்களுக்குப் பள்ளிதான் உலகம்; ஆசிரியர்கள்தான் வெளிச்சம்.