இஸ்லாமியர்களின் அரசியல் உரிமைகளை நிலைநிறுத்தும் காவல் அரண் திமுக: முதல்வர் மு.க.ஸ்டாலின்

இஸ்லாமியர்களின் அரசியல் உரிமைகளை நிலைநிறுத்தும் காவல் அரணாக திமுக எப்போதும் திகழும் என்று கட்சித் தலைவரும் முதல்வருமான மு.க.ஸ்டாலின் உறுதிபடக் கூறினார்.

- 

சென்னை, மார்ச் 24:

திமுக சிறுபான்மையினர் நல உரிமைப் பிரிவு சார்பில் சென்னையில் திங்கள்கிழமை நடைபெற்ற இஃப்தார் விழாவில் பங்கேற்று முதல்வர் மு.க.ஸ்டாலின் பேசியதாவது:

முன்னாள் முதல்வர்கள் அண்ணாவையும், கருணாநிதியையும் இணைக்கப் பாலமாக இருந்ததே இஸ்லாமிய சமுதாயம்தான். திருவாரூரில் நடந்த மீலாது நபி விழாவில்தான் இருவரும் சந்தித்துக் கொண்டனர். திமுக ஆட்சிப் பொறுப்பேற்ற பிறகு அண்ணா, கருணாநிதி ஆகியோரின் ஆட்சிக் காலங்களில் முஸ்லிம் சமுதாயத்துக்காக ஏராளமான சாதனைகள் செய்யப்பட்டன.

மீலாது நபிக்கு விடுமுறை: திமுக ஆட்சிக் காலத்தில் மீலாது நபிக்கு அரசு விடுமுறை விடப்பட்டது. ஆனால், அந்த விடுமுறை அதிமுக ஆட்சியில் நீக்கப்பட்டது. திமுக மீண்டும் ஆட்சிக்கு வந்ததும் விடுமுறை அறிவிக்கப்பட்டது. சிறுபான்மையினர் நல ஆணையம், வக்ஃப் வாரிய சொத்துகளைப் பராமரிக்க மானியம், தமிழ்நாடு சிறுபான்மையினர் பொருளாதார மேம்பாட்டுக் கழகத்தைத் தொடங்கியது உள்ளிட்ட பல சாதனைகள் மறைந்த முன்னாள் முதல்வர் கருணாநிதியின் ஆட்சிக் காலத்தில் செய்யப்பட்டன.