அக்கறை வேண்டும்... ஆட்சியர் கனவில்!

மத்திய குடிமைப்பணித் தேர்வு ஆணையம் நடத்தும் குடிமைப்பணித் தேர்வுக்கு விண்ணப்பிப்போர் மற்றும் தேர்வு எழுதுவோரின் எண்ணிக்கை அதிகரித்து வருகிறது.

- பெ.சுப்ரமணியன்

மத்திய குடிமைப்பணித் தேர்வு ஆணையம் நடத்தும் குடிமைப்பணித் தேர்வுக்கு விண்ணப்பிப்போர் மற்றும் தேர்வு எழுதுவோரின் எண்ணிக்கை அதிகரித்து வருகிறது. மத்திய குடிமைப்பணித் தேர்வு ஆணையம் நடத்தும் இத்தேர்வு உலகின் கடினமான தேர்வுகளில் ஒன்றாகக் கருதப்படுகிறது. இத்தேர்வை எழுத விரும்புவோர் கடந்த காலங்களில் உயர்கல்வியில் வரலாறு, பொது நிர்வாகம் போன்ற குறிப்பிட்ட சில பாடங்களைத் தேர்வு செய்து பயின்றனர். ஆனால், நாளடைவில் குடிமைப்பணித் தேர்வுக்கான வினாத்தாள் அமைப்பு முறையில் மாற்றம் செய்யப்பட்டதால் தற்போதெல்லாம் இதர பாடப்பிரிவுகளைப் பயின்றோரும் இத்தேர்வுக்கு விண்ணப்பிக்கின்றனர்.

கடந்த சில ஆண்டுகளுக்கு முன்பு வரையில் முதன்மைத் தேர்வில் மானுடவியல், சமூக அறிவியல், பன்னாட்டு உறவுகள், புவியியல், சமூகவியல், தத்துவவியல் போன்ற பாடங்களை விருப்பப் பாடங்களாக தேர்வு செய்வது தேர்ச்சிக்கு வழிவகுப்பதாகக் கருதப்பட்டது.

தற்போதும் இத்தேர்வில் தேர்ச்சி பெறும் பொறியியல், அறிவியல் பட்டதாரிகள் பெரும்பாலும் கலை பாடப்பிரிவையே விருப்பப் பாடமாகத் தேர்வு செய்கின்றனர். இத்தகைய பாடப்பிரிவுகள் பழைமையான குறிப்பிட்ட சில கல்லூரிகளில் மட்டுமே கற்பிக்கப்படுகின்றன.