மணிப்பூரில் மீண்டும் வன்முறை: இணைய சேவை துண்டிப்பு

மணிப்பூரில் மைதேயி இனத்தின் அமைப்பான அரம்பாய் தெங்கோலைச் சேர்ந்த தலைவர் ஒருவர் கடந்த சனிக்கிழமை கைது செய்யப்பட்டதாக தகவல் பரவியதையடுத்து, அங்கு மீண்டும் வன்முறை மூண்டது.

- 

இம்பால், ஜூன் 8:

அரம்பாய் தெங்கோல் முக்கியத் தலைவர்களில் ஒருவரான கனன் சிங்கை இம்பால் விமான நிலையத்தில் இருந்து ஞாயிற்றுக்கிழமை கைது செய்ததாக சிபிஐ அதிகாரிகள் தெரிவித்தனர்.

இருப்பினும், கடந்த இரு நாள்களாக மணிப்பூரில் மீண்டும் பதற்றம் நிலவி வருவதால் இம்பால் பள்ளத்தாக்கு மாவட்டங்கள் எனக் கூறப்படும் இம்பால் மேற்கு, இம்பால் கிழக்கு, தெளபால், விஷ்ணுபூர் மற்றும் கக்சிங் ஆகிய 5 மாவட்டங்களில் பல்வேறு தடை உத்தரவுகள் பிறப்பிக்கப்பட்டு தற்காலிகமாக இணைய சேவை துண்டிக்கப்பட்டது.

மணிப்பூரில் 2023, மே மாதம் மைதேயி-குகி சமூகங்களிடையே மோதல் நீடித்து வருகிறது. இதில் 260-க்கும் மேற்பட்டோர் உயிரிழந்தனர், பல்லாயிரக்கணக்கானோர் வீடுகளைவிட்டு நிவாரண முகாம்களில் தங்க வைக்கப்பட்டுள்ளனர். 2023, மே மாதம் வன்முறை தொடங்கியபோது பல்வேறு குற்றச் செயல்களில் ஈடுபட்டதாக குற்றம் சாட்டி கனன் சிங்கை சிபிஐ கைது செய்தது.