ஒவ்வொரு துறையிலும் பெண்களுக்கு அதிகாரமளிப்பு: பிரதமர்

நாட்டில் கடந்த 11 ஆண்டுகளில் ஒவ்வொரு துறையிலும், ஒவ்வொரு நிலையிலும் பெண்களுக்கு அதிகாரமளிக்க பல்வேறு நடவடிக்கைகள் எடுக்கப்பட்டுள்ளன என்று பிரதமர் நரேந்திர மோடி பெருமிதத்துடன் குறிப்பிட்டார்.

- 

போபால், மே 31:

பள்ளிகள் முதல் போர்க்களம் வரை தேசம் தனது மகள்களின் துணிவு மீது முன்னெப்போதும் இல்லாத நம்பிக்கையைக் கொண்டுள்ளது என்றும் அவர் கூறினார்.

மத்திய பிரதேசத்தின் மால்வா பகுதியில் 18-ஆம் நூற்றாண்டில் ஆட்சிபுரிந்த புகழ்பெற்ற மகாராணி அஹில்யாபாய் ஹோல்கரின் 300-ஆவது பிறந்த தினத்தையொட்டி, போபாலில் சனிக்கிழமை நடைபெற்ற மகளிர் அதிகாரமளித்தல் மகா மாநாட்டில் பிரதமர் மோடி பங்கேற்றார்.

பல்வேறு வளர்ச்சித் திட்டங்களைத் தொடங்கிவைத்து, மாநாட்டில் அவர் பேசியதாவது: தேவி அஹில்யாபாய், இந்திய பாரம்பரியத்தின் மிகச் சிறந்த பாதுகாவலர். நாட்டின் கலாசாரம், கோயில்கள் மற்றும் ஆன்மிகத் தலங்கள் தாக்குதலுக்கு இலக்கானபோது, அவற்றைப் பாதுகாக்கும் பொறுப்பை சிரமேற்கொண்டவர். எண்ணற்ற கோயில்களின் புனரமைப்புக்கான அவரது பங்களிப்பும், சமூக சீர்திருத்தப் பணிகளும் குறிப்பிடத்தக்கதாகும்.