10 லட்சம் மாணவர்களுக்கு இலவச மடிக்கணினி

திட்டத்தை தொடங்கி வைத்தார் முதல்வர் மு.க.ஸ்டாலின்

- 

தமிழகம் முழுவதும் 10 லட்சம் மாணவ, மாணவியருக்கு இலவச மடிக்கணினி வழங்கும் திட்டத்தை முதல்வர் மு.க.ஸ்டாலின் திங்கள்கிழமை தொடங்கிவைத்தார்.

சென்னை நந்தம்பாக்கம் வர்த்தக மைய வளாகத்தில் நடைபெற்ற நிகழ்ச்சியில், கல்லூரி மாணவர்களின் திறன் வளர்ச்சி மற்றும் எண்ம முன்னேற்றத்துக்காக 'உலகம் உங்கள் கையில்' எனும் 20 லட்சம் மடிக்கணினிகள் வழங்கும் திட்டத்தின் முதல் கட்டமாக 10 லட்சம் மடிக்கணினிகள் வழங்கும் திட்டத்தை தொடங்கி வைத்து முதல்வர் ஸ்டாலின் பேசியதாவது:

மாணவர்களின் கையில்தான் எதிர்காலம் உள்ளது. மாணவர்களை வளர்த்தெடுத்தால்தான் மாநிலம் வளரும்; நாடு வளரும். அதனால் தமிழக அரசு 'நான் முதல்வன்', 'புதுமைப் பெண்', 'தமிழ்ப் புதல்வன்', தற்போது மடிக்கணினித் திட்டம் போன்றவற்றைச் செயல்படுத்தி வருகிறது.

இன்றைக்கு அறிவியல் தொழில்நுட்பம் ஒட்டுமொத்த உலகத்தையும் நம்முடைய கைகளுக்கு எட்டும் தொலைவுக்கு கொண்டுவந்துவிட்டது; அதை உங்கள் கைகளுக்கே தமிழக அரசு கொண்டு வந்து கொடுத்துள்ளது.

திராவிட இயக்கம் என்பது அறிவியக்கம். அதனால்தான் அறிவியல் சார்ந்த கண்டுபிடிப்புகள் அடுத்தடுத்த தலைமுறைகளுக்கு உடனடியாகக் கிடைக்கச் செய்கிறோம்.