பத்திரப் பதிவுக்கு விருப்ப அடிப்படையில் ஆதார் சரிபார்ப்பு; வரைவு மசோதா பிரிவுகள்

சொத்துப் பத்திரங்கள் மற்றும் பிற ஆவணங்களின் பதிவை இணையவழியில் மேற்கொள்ள வழிவகை செய்யும் புதிய வரைவு மசோதாவின்கீழ், பத்திரப் பதிவுக்கு விருப்பத்தின்பேரில் ஆதார் அடிப்படையிலான சரிபார்ப்பை மேற்கொள்வதற்கான பிரிவு இடம் பெற்றுள்ளது.

- 

புது தில்லி, மே 28:

ஆதார் எண் இல்லாதவர்கள் அல்லது ஆதாரை பயன்படுத்த விரும்பாதவர்களுக்கு மாற்று சரிபார்ப்பு வழிமுறைகளும் இடம்பெற்றுள்ளன.

117 ஆண்டுகள் பழைமைவாய்ந்த பதிவுச் சட்டம் 1908-க்கு மாற்றான புதிய வரைவு மசோதா-2025ஐ மத்திய ஊரக மேம்பாட்டு அமைச்சகத்தின் நில வளங்கள் துறை தயாரித்துள்ளது. காகித பயன்பாடு இல்லாத நவீன பத்திரப்பதிவு முறையை நோக்கமாகக் கொண்டு இம் மசோதா உருவாக்கப்பட்டுள்ளது.

இணையவழியில் ஆவணப் பதிவு, மின்னணு சான்றுகள் சமர்ப்பிப்பு, ஆவணங்கள் ஏற்பு மற்றும் மின்னணு பதிவுச் சான்று வழங்கல், எண்மரீதியில் ஆவணங்கள் பராமரிப்பை ஊக்குவிக்கும் புதிய பிரிவுகள் இடம்பெற்றுள்ளன. பொதுமக்களின் கருத்தறிவதற்காக இம் மசோதா வலைதளத்தில் வெளியிடப்பட்டுள்ளது.