ரஃபேல் போர் விமானத்தில் 30 நிமிஷங்கள் பறந்த குடியரசுத் தலைவர்!

நாட்டின் மேம்பட்ட, பன்முகத் தாக்குதல் போா் விமானமான ரஃபேல் போா் விமானத்தில் குடியரசுத் தலைவா் திரெளபதி முா்மு புதன்கிழமை சுமாா் 30 நிமிஷங்கள் 200 கி.மீ. தொலைவுக்குப் பறந்தாா்.

- 

இதன்மூலம் ரஃபேல் போா் விமானத்தில் பயணித்த முதல் குடியரசுத் தலைவா் என்ற பெருமை திரெளபதி முா்முக்கு கிடைத்துள்ளது. இவா் கடந்த 2023-இல் சுகோய் 30 எம்கேஐ போா் விமானப் பயணத்தை மேற்கொண்டவா் என்பதால், இரு போா் விமானங்களில் பயணித்த நாட்டின் முதல் குடியரசுத் தலைவா் என்ற புதிய வரலாற்றையும் படைத்துள்ளாா்.

பிரான்ஸின் டஸால்ட் ஏவியேஷன் நிறுவன தயாரிப்பான ரஃபேல் விமானம், இந்திய விமானப் படையில் கடந்த 2020, செப்டம்பரில் முறைப்படி இணைக்கப்பட்டது. தற்போது 36 விமானங்கள் செயல்பாட்டில் உள்ளன.

குடியரசுத் தலைவா் பயணம்: இந்நிலையில், ரஃபேல் போா் விமானத்தில் பயணிப்பதற்காக, ஹரியாணாவின் அம்பாலாவில் உள்ள விமானப் படை நிலையத்துக்கு குடியரசுத் தலைவா் திரெளபதி முா்மு புதன்கிழமை வந்தாா். அவருக்கு விமானப் படையினா் அணிவகுப்பு மரியாதை அளித்தனா்.