சிலை கடத்தல் கோப்புகள் மாயமான வழக்கு: தமிழக அரசுக்கு கேள்விகள்

தமிழகத்தில் சிலை கடத்தல் வழக்கு கோப்புகள் மாயமானதாகக் கூறப்படும் விவகாரத்தில், தமிழக அரசுக்கு உச்ச நீதிமன்றம் அடுக்கடுக்காக பல்வேறு கேள்விகளை எழுப்பியது. மேலும், இந்த வழக்கில் மத்திய அரசையும் நீதிமன்றம் இணைத்துள்ளது.

- 

தமிழகத்தில் சிலை கடத்தல் வழக்கு விசாரணை கோப்புகள் மாயமான விவகாரத்தில் சிறப்பு புலனாய்வுக் குழு அமைக்கக் கோரி வழக்குரைஞர் யானை ராஜேந்திரன் தொடர்ந்த மேல்முறையீட்டு வழக்கு உச்ச நீதிமன்றத்தில் செவ்வாய்க்கிழமை விசாரணைக்கு வந்தது.

நீதிபதிகள் பி.வி. நாகரத்னா, ஆர். மகாதேவன் அடங்கிய அமர்வில் மனுதாரர் யானை ராஜேந்திரன் முன்வைத்த வாதம்: சிலை கடத்தல் வழக்கு தொடர்பான ஆவணங்கள் மாயமானது சாதாரண விஷயம் அல்ல. 38 காவல் நிலையங்களில் இருந்த 41 ஆவணங்கள் திருட்டுப் போயுள்ளன. காவல் துறையின் பாதுகாப்பிலிருந்து ஆவணங்கள் மாயமானதை எவ்வாறு சாதாரணமாக எடுத்துக்கொள்ள முடியும்?.

இந்த 41 ஆவணங்களும் முழுமையாக அழிக்கப்பட்டுள்ளன அல்லது காணாமல் போயுள்ளன. ஒருவேளை காணாமல் போயிருந்தால்கூட அது தொடர்பாக சம்பந்தப்பட்ட காவல் நிலைய பொறுப்பாளர் மீது வழக்குப் பதிவு செய்ய வேண்டும்.

ஆனால், ஒரு முதல் தகவல் அறிக்கைகூடப் பதிவு செய்யப்படவில்லை.