இல.கணேசன் மறைவு: ஆளுநர், முதல்வர், தலைவர்கள் இரங்கல்

நாகாலாந்து ஆளுநர் இல.கணேசனின் மறைவுக்கு தமிழக ஆளுநர் ஆர்.என்.ரவி, முதல்வர் மு.க.ஸ்டாலின் மற்றும் அரசியல் கட்சித் தலைவர்கள் உள்ளிட்டோர் இரங்கல் தெரிவித்துள்ளனர்.

- 

சென்னை, ஆக. 15:

ஆளுநர் ஆர்.என்.ரவி: நாகாலாந்து ஆளுநர் இல.கணேசன் மறைவால் மிகுந்த வேதனையடைந்தேன். இளம் வயதிலிருந்தே எளிமையுடனும் பணிவுடனும், தன்னலமற்ற சேவைகளுக்காகவும், மக்கள் நலனுக்காகவும் அவர் தன்னை அர்ப்பணித்துக் கொண்டார். அவரது மறைவு தேசத்துக்கு ஈடுசெய்ய முடியாத பேரிழப்பு.

முதல்வர் மு.க.ஸ்டாலின்: மூத்த அரசியல் தலைவரும் நாகாலாந்து ஆளுநருமான இல.கணேசன் மறைந்த செய்தி அறிந்து மிகவும் துயரம் அடைந்தேன். அரசியல் வாழ்க்கைக்காகத் திருமணம் கூட செய்து கொள்ளாமல் பொது வாழ்வுக்குத் தன்னை அர்ப்பணித்தவர். நெருக்கடிநிலை பிரகடனத்தை கண்டித்துப் போராட்டம் நடத்தி, பாடல்கள் எழுதியவர்.

மாற்றுக் கொள்கைகள் கொண்ட இயக்கங்களில் உள்ள தலைவர்களிடத்திலும் மரியாதை பாராட்டி, மாண்புடன் நடந்து கொண்டு அரசியல் நாகரிகத்தை பேணிக்காத்த அரிய தலைவர்களில் ஒருவர்.