கரோனா, இன்ஃப்ளுயன்ஸா பரிசோதனைகள் இனி அரசு மருத்துவமனைகளில் புதிய நடைமுறை

அரசு மருத்துவமனைகளில் கரோனா, இன்ஃப்ளுயன்ஸா, நுரையீரல் தொற்று பாதிப்புகளை (ஆர்எஸ்வி) ஒற்றை பரிசோதனையில் கண்டறியும் புதிய நடைமுறை விரைவில் அமலாக உள்ளது.

- ஆ.கோபிகிருஷ்ணா

அதற்காக மல்டிப்ளக்ஸ் ஆர்டி பிசிஆர் எனப்படும் மருத்துவ உபகரணங்களை தமிழ்நாடு மருத்துவப் பணிகள் கழகம் கொள்முதல் செய்துள்ளது. ஒரே பரிசோதனையில் ஐந்து விதமான வைரஸ் தொற்றுகளை அதில் கண்டறிய முடியும் எனத் தெரிவிக்கப்பட்டுள்ளது.

தற்போது வரை அறிகுறிகளின் அடிப்படையில் ஒவ்வொரு பரிசோதனையும் தனித்தனியே மேற்கொள்ளப்பட்டு வருகிறது. இதனால், நோயைக் கண்டறிவதற்கும், சிகிச்சைகளைத் தொடங்குவதற்கும் குறிப்பிட்ட கால அவகாசம் தேவைப்படுகிறது.

அதேவேளையில், புதிய மருத்துவப் பரிசோதனை நுட்பம் நடைமுறைப்படுத்தப்பட்டால், எந்த வகையான பாதிப்பு என்பதை ஒரு மணி நேரத்துக்குள் கண்டறிந்து உடனடியாக சிகிச்சையைத் தொடங்க முடியும் என மருத்துவர்கள் தெரிவிக்கின்றனர்.