குஜராத்: பாலம் இடிந்து 11 பேர் உயிரிழப்பு

குஜராத் மாநிலம், வதோதரா மாவட்டத்தில் 40 ஆண்டுகள் பழைமையான பாலத்தின் ஒரு பகுதி திடீரென இடிந்ததில், அதன் வழியாகச் சென்று கொண்டிருந்த 6 வாகனங்கள் ஆற்றுக்குள் விழுந்தன.

- 

இதில் ஒரே குடும்பத்தைச் சேர்ந்த மூவர் உள்பட 11 பேர் உயிரிழந்தனர். இவர்களில் 2 பேர் குழந்தைகள். ஆற்றுப் பாலம் துண்டாக இடிந்து விழுந்த சம்பவம், பொதுமக்கள் மத்தியில் அதிர்ச்சியை ஏற்படுத்தியுள்ளது.

குஜராத்தின் வதோதரா, ஆனந்த் ஆகிய மாவட்டங்களுக்கு இடையே மஹிசாகர் ஆற்றின் குறுக்கே 23 உயரமான தூண்களுடன் 900 மீட்டர் நீள பாலம் அமைந்துள்ளது. 1985-ஆம் ஆண்டில் மக்களின் பயன்பாட்டுக்குத் திறக்கப்பட்ட இப்பாலம், மத்திய குஜராத் மற்றும் சௌராஷ்டிரா பகுதிக்கு இணைப்பை வழங்குவதாகும்.

இந்தப் பாலத்தின் இரண்டு தூண்களுக்கு இடைப்பட்ட 15 மீட்டர் நீளமுள்ள பகுதி புதன்கிழமை காலை 7.30 மணியளவில் திடீரென இடிந்து விழுந்தது. அப்போது பாலத்தின் வழியாகச் சென்று கொண்டிருந்த 2 லாரிகள், 2 வேன்கள், ஒரு ஆட்டோ, ஒரு மோட்டார் சைக்கிள் ஆகிய வாகனங்கள் ஆற்றுக்குள் விழுந்தன.

இதுகுறித்து தகவல் அறிந்ததும், காவல் துறையினர், தீயணைப்புப் படையினர், மாநகராட்சிப் பணியாளர்கள், தேசிய பேரிடர் மீட்புப் படையினர் விரைந்து சென்று மீட்புப் பணியில் ஈடுபட்டனர்.

உயிரிழந்த 11 பேரின் உடல்கள் மீட்கப்பட்டன. இவர்களில் 2 வயது சிறுவன், அவரின் சகோதரியான 4 வயது சிறுமி ஆகியோரும் அடங்குவர். மேலும் 2 பேர் மாயமாகியிருக்கலாம் எனத் தெரிகிறது. அவர்களைத் தேடும் பணி நடைபெற்று வருவதாக காவல் கண்காணிப்பாளர் (வதோதரா ஊரகம்) ரோஹன் ஆனந்த் தெரிவித்தார்.