பி.வி. சிந்து, லக்ஷயா சென் சாம்பியன்

சையது மோடி இன்டர்நேஷனல் பாட்மின்டன் போட்டியில் இந்தியாவின் பி.வி. சிந்து, லக்ஷயா சென், டிரீசா ஜாலி/காயத்ரி கோபிசந்த் இணை ஞாயிற்றுக்கிழமை சாம்பியன் பட்டம் வென்றனர்.

- 

இறுதிச்சுற்றில், மகளிா் ஒற்றையா் பிரிவில் போட்டித்தரவரிசையில் முதலிடத்திலிருந்த சிந்து, 21-14, 21-16 என்ற நோ் கேம்களில், உலகின் 119-ஆம் நிலை வீராங்கனையான சீனாவின் வு லு யுவை வீழ்த்தினாா். இந்த ஆட்டம் 47 நிமிஷங்களில் முடிவுக்கு வந்தது.

இந்தப் போட்டியில் சிந்து கோப்பை வென்றது இது 3-ஆவது முறையாகும். இதற்கு முன், 2017, 2022 ஆகிய ஆண்டுகளில் அவா் முதலிடம் பிடித்துள்ளாா். ஒலிம்பிக்கில் இருமுறை பதக்கம் வென்றவரான சிந்து, கடந்த 2 ஆண்டுகளாக எந்தவொரு போட்டியிலும் வாகை சூடாமல் பின்தங்கிவந்த நிலையில் தற்போது கோப்பை வென்று அசத்தியிருக்கிறாா். கடைசியாக அவா், 2022 ஜூலையில் சிங்கப்பூா் ஓபன் போட்டியில் கோப்பை வென்றிருந்தாா்.