காங்கிரஸ் வங்கிக் கணக்குகள் முடக்கம்

வருமான வரித்துறை நடவடிக்கை - விடுவித்தது மேல்முறையீட்டு தீர்ப்பாயம்

- 

வருமான வரி நிலுவை ரூ.210 கோடியை செலுத்தக் கோரி, காங்கிரஸின் முக்கிய வங்கிக் கணக்குகளை வருமான வரித்துறை முடக்கியது.

5 நாள்களுக்கு...: காங்கிரஸின் முறையீட்டைத் தொடர்ந்து, வங்கிக் கணக்குகளை வருமான வரி மேல்முறையீட்டுத் தீர்ப்பாணயம் விடுவித்தது. இந்த விவகாரம் தொடர்பாக அடுத்த வாரம் புதன்கிழமை (பிப்.21) மீண்டும் விசாரணை நடைபெறும் வரை காங்கிரஸ் கட்சியின் வங்கிக் கணக்குகள் செயல்பட அனுமதி வழங்கப்பட்டுள்ளது.

அதேநேரம், வங்கிக் கணக்குகளில் ரூ.115 கோடி இருப்பை உறுதி செய்ய வேண்டுமென நிபந்தனை விதிக்கப்பட்டிருப்பதாக காங்கிரஸ் தெரிவித்துள்ளது. மக்களவைத் தேர்தல் நெருங்கி வரும் நிலையில், வருமான வரித்துறையின் இந்த நடவடிக்கை அரசியல் வட்டாரங்களில் பரபரப்பை ஏற்படுத்தியுள்ளது.

காங்கிரஸின் வங்கிக் கணக்குகள் முதலில் முடக்கப்பட்ட தகவலை செய்தியாளர்களிடம் வெள்ளிக்கிழமை தெரிவித்த அக்கட்சியின் பொருளாளர் அஜய் மாக்கன், பின்னர் அந்தக் கணக்குகள் விடுவிக்கப்பட்டவிவரத்தை எக்ஸ் வலைதளத்தில் பதிவிட்டார்.

'அற்ப காரணங்களுக்காக முடக்கம்': செய்தியாளர்களிடம் அஜய் மாக்கன் கூறுகையில், 'மக்களவைத் தேர்தல் 2019-இல் நடைபெற்றது. இதனால் 2018-19ஆம் நிதியாண்டில் கட்சியின் வருமான வரிக்கணக்கு தாக்கலில் சில நாள்கள் தாமதம் ஏற்பட்டது.