திமுக ஆட்சியில் ரூ.3,500 கோடி கோயில் நிலங்கள் மீட்பு

பிரதமர் விமர்சனத்துக்கு முதல்வர் ஸ்டாலின் பதில்

- 

திமுக ஆட்சியில் ரூ.3,500 கோடிக்கும் அதிக மதிப்பிலான கோயில் நிலங்கள் மீட்கப்பட்டுள்ளதாக முதல்வா் மு.க.ஸ்டாலின் தெரிவித்தாா்.

‘தமிழகத்திலுள்ள கோயில்களை திமுக அரசு ஆக்கிரமித்துள்ளது’ என்ற பிரதமா் நரேந்திர மோடியின் விமா்சனத்துக்கு பதிலளிக்கும் வகையில் முதல்வா் இவ்வாறு கூறினாா்.

சென்னையில் வியாழக்கிழமை நடைபெற்ற ‘வள்ளலாா் -200’ ஓராண்டு தொடா் நிகழ்வுகளின் நிறைவு விழாவில் முதல்வா் மு.க.ஸ்டாலின் பேசியதாவது:

வள்ளலாருக்கு நாம் ஆற்ற வேண்டிய கடமையை, மரியாதையை நிறைவாக ஆற்றி இருக்கிறோம். தொடா் அன்னதானங்கள் 21 மண்டலங்களில் நடைபெற்றுள்ளன. தொடக்க விழா, நிறைவு விழாவுடன் சோ்த்து 52 நிகழ்ச்சிகள் நடைபெற்றுள்ளன.

இன்று இந்தக் காலகட்டத்துக்குத் தேவையான மிக முக்கியமான வழிகாட்டி வள்ளலாா். இறையியல் என்பது அவரவா் விருப்பம். தனிப்பட்ட உரிமை. ஆனால், அந்த இறையியலை, ஆன்மிக உணா்வை ஒரு கூட்டம் அரசியலுக்குப் பயன்படுத்தி, அதன்மூலம் பலனடையப் பாா்க்கிறது.