ரகசிய நண்பன் கிரேசிமோ

தூத்துக்குடி மாணவர்கள் உருவாக்கிய அசத்தல் ரோபோ

- 

இளம் தலைமுறை முதல் முதியோர் வரை எல்லோருக்கும் ஏதாவது ஒரு விதத்தில் தினமும் ஒரு ஆலோசனை தேவைப்படுகிறது. அவர்களின் வாழ்வியல் நடைமுறை சிக்கல்களை தீர்ப்பதிலிருந்து சிறிய வீட்டுப் பிரச்னைகள் வரை பல விதங்களில் ஆலோசனை பெறுகின்றனர். இளைஞர்களின் வாழ்க்கையை வடிவமைப்பதிலும் ஆலோசனைகள் பெரும் பங்கு வகிக்கின்றன. இளம் மனங்களுக்கு அவர்களின் ஆளுமையை மெருகூட்ட ஆலோசனை தேவைப்படுகிறது. இந்த ஆலோசனைகளை யாரிடம் பெறுவது என யோசித்து நிற்பவர்களுக்காக தூத்துக்குடி கிரேஸ் பொறியியல் கல்லூரியில் பயிலும் மாணவர்கள் கிரேசிமோ (GraceEmo) என்னும் உரையாடும் ஏ.ஐ. (AI) ரோபோவை உருவாக்கியுள்ளனர். இது செயற்கை நுண்ணறிவையும் இயற்கை மொழி புரிதல் (Natural Language Processing NLP) தொழில்நுட்பத்தையும் அடிப்படையாகக் கொண்டு மனிதர்களைப் போல உரையாடும் வகையில் இயங்குகிறது.

மாணவர்களின் கல்வி தொடர்பான சந்தேகங்களை தீர்ப்பதோடு அவர்களுக்கு உணர்வுபூர்வமான ஆதரவு மற்றும் வழிகாட்டுதல் தேவைப்படும்போது ஆலோசகராகவும் செயல்படுகிறது. மூன்றாம் ஆண்டு செயற்கை நுண்ணறிவு மற்றும் தரவியல் துறையில் (B.Tech AIDS) 4ம் ஆண்டு பயிலும் மாணவர்கள் அலெக்ஸ் மாத்யூ, பாலமுருகன், ஜான் ஆல்சன் சர்வேஷ் மற்றும் சாம் டேவிட் ஆகியோர் இந்த கிரேசிமோ-வை தயாரித்துள்ளனர். இந்த ரோபோ கல்லூரிக்கு வரும் பெற்றோரையும், விருந்தினர்களையும் புன்னகையுடன் வரவேற்கிறது.