பட்டாசு ஆலை விபத்தில் பலி 9 ஆக உயர்வு

உடல்களை வாங்க மறுத்து உறவினர்கள் போராட்டம்

- 

பட்டாசு ஆலை வெடி விபத்தில் உயிரிழந்தவர்களின் குடும்பங்களுக்கு ஆலை நிர்வாகம் தரப்பில் ரூ.10 லட்சம் நிவாரணம் வழங்கக்கோரி, உடலை வாங்க மறுத்து உறவினர்கள் 2வது நாளாக போராட்டம் நடத்தினர்.

விருதுநகர் மாவட்டம், சாத்தூர் அருகே சின்னக்காமன்பட்டியில் உள்ள பட்டாசு ஆலையில் நேற்று முன்தினம் ஏற்பட்ட வெடி விபத்தில் 8 தொழிலாளர்கள் உயிரிழந்தனர். 5 பேர் படுகாயமடைந்தனர். இறந்த 7 தொழிலாளர்களின் உடல்கள் உடற்கூராய்வுக்காக விருதுநகர் அரசு மருத்துவக் கல்லூரி மருத்துவமனைக்கும், ராமமூர்த்தி என்பவரின் உடல் சிவகாசி அரசு மருத்துவமனைக்கும் கொண்டு செல்லப்பட்டது. பட்டாசு ஆலை வெடி விபத்தில் தொழிலாளி ஒருவர் உயிரிழந்தால் கடந்த காலங்களில் ஆலை நிர்வாகம் ரூ.5 லட்சம் நிவாரணமும், ரூ.50 ஆயிரம் இறுதி சடங்கிற்கும் என மொத்தம் ரூ.5.50 லட்சம் வழங்குவது வழக்கமாக இருந்தது.