DIE ANTWOORDE ONTMBREEK NOG

HOE kan iemand net spoorloos verdwyn en maande later - net 'n paar kilometer van sy huis - gevind word?

- 

Die Fredericks-familie het Saterdag van Romano afskeid geneem.

(FOTO'S VERSKAF)

Dit is die vraag waarmee die Fredericks-familie van Vredenburg worstel nadat die oorskot van Romano Fredericks (18) ag maande nadat hy vermis geraak het, deur 'n plaaswerker gekry is.

Fanie Gertse, voorsitter van die Search and Rescue Unit, het aan Son gesê Romano se oorskot is net vyf kilometer buite Vredenburg op die plaas Heuningklip gekry. Volgens hom het Romano nog klere aangehad.

"Hy was geklee in sy blou-en-wit tekkies met sokkies aan, sy broek en T-shirt. En naby sy kop is 'n haartossel gevind - hy het glo altyd 'n bolla gedra."

Hy vertel dat die terrein destyds ook deurgesoek is, maar dit was oestyd en groot dele van die plaas was dig en hoog.

"Ons het geweet dit kan hy wees. Maar ons het gehoop, vir die familie se onthalwe, dat dit nie hy is nie."