LYK IN VLAK GRAF GEKRY

Swanger vrou (23) wat vermis was se familie in rou

- KHIRSTEN BOOYS

"GENOEG is genoeg. As jy iets sien of hoor, neem aksie.

Dít is die dringende boodskap van die aktivis Lucinda Evans nadat die liggaam van 'n vermiste swanger vrou Dinsdag in 'n vlak graf gevind is.

Die liggaam van Shanice Chante Rudolph (23) van Lavender Hill is in die Klip Road-begraafplaas ontdek. Sy was drie maande swanger.

Rudolph is op 5 Desember as vermis aangemeld nadat sy die vorige dag haar huis saam met haar kêrel verlaat het. Die man is Dinsdag in hegtenis geneem.

Evans beklemtoon dat vermiste mense onmiddellik aangemeld moet word, of dit nou jou kind of kleinkind is. “Nie alles is 'n weghardloop-storie nie,” sê sy.

Sy beskryf die moord as "unbelievably" en vra hoe lank die land nog stil gaan bly oor geweld teen vroue.

"Gaan ons nou weer ophou praat van geslagsgebaseerde geweld, of gaan ons aanhou praat vir die volgende 346 dae van aktivisme? Dit is veronderstel om 346 dae te wees – nie net 16 nie,” sê Evans.