SEUNTJIE BELAND ONDER MYCITY-BUS

Vyfjarige se partytjie-reëlings word toe begrafnisreëlings

- CARRINGTON SWARTS

GONE TOO SOON: Tashreeqo Fredericks het onder die wiele van 'n MyCity-bus beland.

IN PLAAS daarvan om 'n verjaardagkoek te gaan kies moes 'n familie van Atlantis 'n wit doodskis vir hulle vyfjarige seuntjie uitsoek.

Tashreeqo Fredericks (5) is op 30 Oktober deur 'n MyCiti-bus getref nadat hy onder die bus se wiele beland het - 'n paar weke voor sy sesde verjaardag.

Hy was in gr. R aan die Primêre Skool Berzelia.

William Fredericks, sy oupa, is die laaste persoon wat hom lewend gesien het. Volgens Fredericks het hy van die werk af gekom en Tashreeqo en sy sussie het hom nog gegroet.

"Hulle het van die huis af gekom en ek het aangeneem hulle is op pad na sy ouma toe. Hy het my nog gegroet toe ek van die bus afklim," vertel die oupa emosioneel.

Nooit sou hy kon dink dat dit die laaste sou wees dat hy sy kleinseun lewend sou sien nie.

"Ek het toe huis se kant toe gekom en weg beweeg van hom af, toe ek net 'n slag gehoor het."

Fredericks sê hy het omgedraai en gaan kyk wat gebeur het.