MUSIEK UIT 'N PLEK VAN ERVARING

IN 'N wêreld waar roem dikwels met glamour en rykdom geassosieer word, staan Kevin Booysen (51) as 'n ander soort ster uit.

- KHIRSTEN BOOYS

Die stigter van die gospel-aanbiddingsgroep Dumisani beskryf homself eenvoudig as 'n stem in die woestyn.

Booysen se verhaal begin in Woodlands in Mitchells Plain, waar sy enkelma hom en sy suster op 'n government grant grootgemaak het.

Hy vertel die omstandighede was nie altyd maklik nie, maar dit was daar waar die grondslag van sy geloof en karakter gelê is.

In sy twintigerjare, terwyl hy in 'n informele nedersetting in Heinz Park gewoon het, het Booysen die visie vir Dumisani ontvang.

“Die begin was nederig. Ek en 'n paar ander het begin om koortjies en kerkliedere op kassette op te neem in die instrumente-kamer van 'n kerk en in die sitkamer van 'n vriend se huis,” onthou hy.

“Ons het opnames gedoen met beperkte toerusting, maar baie passie.”

Sitkamer

Wat as 'n klein groep van vier tot vyf mense begin het, het mettertyd gegroei tot een van Suid-Afrika se mees gerespekteerde gospelaanbiddingsgroepe. Die reis was egter nie maklik nie.

“Ek het begin met niks meer nie as geloof, 'n klomp drome en 'n mikrofoon in iemand se sitkamer,” verduidelik Booysen.

“Ek wou nie net musiek maak nie. Ek wou 'n beweging begin. Met tyd het God deure oopgemaak. Die reis was vol seisoene van wag, geloof en groei, maar elke stap het my karakter gevorm.”

Vandag bestaan Dumisani uit talentvolle sangers, musikante en tegniese mense wat saam een boodskap oordra: Jesus leef.