'GLORIEDAE SAL KOM'

DIE ding het Saterdag, op die voorlaaste dag van die huidige LFA-seisoen, behoorlik geruk op die Metropolitan-sportterrein in Bonteheuwel.

- SPORTREDAKSIE

En dié wat gesê het sokker op die Met is dood, kon gerus kom kyk het hoe toeskouers in groot getalle opgeruk het na die twee wedstryde wat waarskynlik die tuiste van die Premierligaen Eerste Liga-titel gaan bepaal.

Sporting United, 'n span wat verlede seisoen nog gesukkel het om kop bo water te hou, was by albei dié stryde betrokke. En albei Sporting se senior-spanne was in die running vir liga-glorie.

Maar soos dinge dit wou hê, het nie alles volgens plan verloop vir chairman Denver Bartlett se klub nie.

In die First Division het Sporting sake uitgespook met Bluegum United - en die span wat dié wedstryd sou wen, sou as koning in dié afdeling gekroon word.

Ongelukkig vir die manne in rooi-wit-en-blou het die dag aan Bluegum behoort wat met 2-0 gewen het.