MA MOES GLO RAPIST OP FACEBOOK SOEK

'N MAMMA van Capricon naby Vrygrond voel die polisie het haar en haar vyfjarige meisiekind lelik in die steek gelaat.

- FRANSCISKA SWARTS

Die ma meen die kind se verkragtingsaak is nie deur die polisie met die nodige erns gehanteer nie. Sy beweer ook dat die polisie haar aangesê het om self op Facebook na die kind se verkragter te gaan soek.

Die vrou vertel dat haar jongste op 31 Augustus by 'n parkie naby hulle huis deur 'n onbekende man verkrag is en dat sy die kind self na die polisiekantoor in Muizenberg moes neem nadat die polisie na vele oproepe nie opgedaag het nie.

By die polisiekantoor is hulle na die Victoria-hospitaal in Wynberg verwys, waar wel bevestig is dat die kind verkrag is.

Weggedra

“Ek was besig in die huis toe my kind by die parkie gespeel het. Dit was rondom 14:00.

“Die man het glo my kind daar gesien speel en haar op haar naam geroep. Sy vertel dat sy gegaan het en dat die man haar opgetel en op sy heup weggedra het.”

Sy sê toe die kind later huis toe kom, het sy opgelet iets is fout.